15 May 2019 02:02

inkhel

Pro Volleyball Final-ah Chhinga Veng Spikers leh Durtlang North

Suzuki Gixxer Pro Volleyball League semifinal hnuhnung zawk chu May ni 14, Thawhlehni zan Khan Chhinga Veng Spikers leh Hunthar Veng ten an khel a, Chhinga Veng Spiker chuan 3-2 a hnehna changin a vawi hnih nan final an lut.

Semifinal hmasa zawkah Durtlang North-in 3-1 a Anastasia Electric Veng hnehin semifinal an lut tawh a, final-ah Durtlang North leh Chhinga Veng Spiker te an inhmachhawn ang a, Final hi May ni 16, Ningani zan dar 8:00-ah khelh tur a ni.

Chhinga Veng Spiker hi Pro Volleyball-ah an tel vawi hnihna niin 2017 khan final-ah Hunthar hneh lovin an tlawm a ni. Hunthar nen Pro Volleyball-a an insut vawi lina niin a tum thum nan an chak a, 2017 khan league-ah an hneh a, tun tumah hian league leh semifinal-ah an hneh ve ve a ni.

Pro Volleyball-a team hlawhtling ber leh vawi li neih tawha tel kim thei vek Huntharin vawi thum champion zawn an tumna an puitlin zo lo va, championship hmasa ber 2016 ang thovin final lut pha lovin an tla. Vawi hnih champion zawn hmasa ber leh tum khat aia tam trophy la thei awm chhun Huntharin 2017 final-ah Chhinga Veng an hneh a, nikum final-ah Tuichangral hnehin trophy an humhim.

Chhinga Veng Spikers tan Mandeep Singh a thawh hlawk hle a, an chakna hnar a ni. Chhinga Vengin set hmasa pahnih an thunun hnuah chak tlang nghal thei turin an khel zui zel. Set thumnaah point khat hmuh belha final lut turin hun tha vawi thum an nei a, an tlang zo lo.

Deepesh Kumar Sinha chuan Hunthar fuih phurin harsa taka set thumna an lak hnuin set lina hneh takin an awpbet zui ve leh. A chak tur chinfelna hnuhnung ber set nganaah rin hlawh tawh lo zawk Chhinga Veng tan Mandeep Singh chuan point riat a hlawh a, kawng dikah kir lehin vawi hnih champion zawn mek Hunthar an vaw tla.

India senior team rinrawl ni thin Mandeep hian a vaiin point 40 hmuin 15 a paih a, Chhinga Vengin set thum an lak theihna hnar pawimawh tak a ni vek. Amah thlawp thei ber F Lalngilneia'n point nga hmuin point hnih a hloh a ni.

2017 khan a vawi khat nan Chhinga Vengin Pro Volleyball an khel a, khelmual chhunga lut player paruk zingah state pawn player pahnih an tel thei. Mandeep leh Gurinder Singh ruaiin an hlawhtlinpui hle a, set hloh lova final an luh hnuah Hunthar ngam lovin an tlawm.

Mandeep la kir lehin a vawi hnih nan Pro Volleyball-ah an tel a, final lut lehin ningani zanah league-a an hneh loh awm chhun Durtlang North nen trophy an inchuh dawn. Chhinga Veng hian Hunthar lakah hnuhma tha tak an nei nghal a, vawi li an inkhelh tawhah tum thum chakin 2017 khan league-ah an hneh a, tun tumah league leh semifinal-ah an hneh ve ve.

Pro Volleyball-a team hlawhtling ber Huntharin vawi thum champion zawn an tumna an puitlin zo lo va, championship hmasa ber 2016 ang thovin final an luh phak loh vawi hnihna a ni. India senior team tana khel tawh Deepesh erawh mi malin a langsar a, Spikers lakah point 48 hmuin 20 a hloh va, RS Traders Player of the Night lawmman a dawng.

A tir set hnihah Huntharin Chhinga Veng an ngam lo va, mi mal inelnaah Mandeep chuan Deepesh a chungtlak thei bawk. Set hmasa berah 13-13 a nih laiin Mandeep chuan a vaw tla a, Chhinga Vengin derthawng zui lovin hma an hruai tluan.

Mandeep leh Mangila'n net bulah Hunthar thahrui pawimawh Deepesh-a vuak an dang tam a, champion lai talbuaiin inrintawkna an hloh. Chhinga Vengin nuam ti taka an khelh laiin Hunthar Mizo player-ten awmze nei thamin an inlan zo lo va, awlsam zawkin set hnihnaah Spikers an chungnung.

Set thumna tirah Chhinga Vengin inkhel an thunun zel a, Mandeep chuan vaw tla zawnin 12-8 in an sang a, a hnuah Deepesh chuan ho takin a tisual a, 14-10 a ni leh. Hunthar tan set hloh a thiang tawh lo va, a umtu zawkah tang zelin 24-22 in lehlam an sang zui leh.

Point khat hmuh belha tlang mai turin Chhinga Vengin hun tha vawi hnih an nei a, he hun harsa takah hian Huntharin an bei let. Deepesh chuan vaw tlain Mandeep-a vuak an dang tla zui bawk a, 24-24 a nih rualin an deuce. Mandeep chuan hlap tlain Spikers-in chakna hun tha an nei nawn leh.

Mahse, Lalrinhlua'n Hunthar thinphu tirehin a vaw tla a, Deepesh chuan point hlu tak hmu zawn zui ve lehin Chhinga Veng an nawr let a, inkhel boruak a inthlak zui bawk. Phurna thar nen Hunthar an inlan a, team pumpuiin nung takin an khel zui.

20-10 in Hunthar an sang a, Chhinga Veng bet ve thungin an thahrui pawimawh Mandeep a chau va, team pumpui a nghawng. Set lina tawp dawnah coach Jesse Lalpianpuia chuan Mandeep la chhuakin a hahchawlhtir a, set nganaa kir leh tumin ruahmanna a siam.

Awlsam takin Huntharin an tlang a, set hnih ve ve an lak hnuah set thum la zawn turin rin an hlawh zui zel. Mahse, Mandeep chuan rei lo te chhung hahchawlhna hun a neih chhawrin Chhinga Veng a fuih phur thar leh a, Lalnunpuia'n set hnuhnung berah Spikers a tanpui bawk.

A tir atangin Chhinga Vengin hma an hruai a, Hunthar innghahna Deepesh che buai ve thungin Mandeep chuan a vuak a dansak a, Spikers-in 14-10 in hma an hruai. Hunthar tan tal chhuahna kawng a awm tawh lo va, point khat an hmuh belh hnuin lehlam an tlang a, Mandeep chuan set hnuhnung bera point 15 an neih atanga a zahve aia tam a hlawh chhuak.

Team pahnih tan Mandeep leh Deepesh an langsar fal ve ve a, Chhinga Veng lamah set nga an inkhelh chhungin mi mala point nga aia tam hmu thei player dang an awm lo. Hunthar tan Rinhlua'n point 13 hlawhin vawi khat chiah tihsual a nei a, Ramengmawia'n tum riat vaw tlain point thum a paih bawk a ni.