Pro Volleyball a tan MVA leh LPS thawk dum dawn

09th January 2019, 11:01PM

LPS Vision nen Pro Volleyball League buatsaih tura inremna an siam bakah Mizoram Volleyball Association (MVA) hruaituten Sports Minister Pu Robert Romawia Royte hnenah an mamawh an thlen.

January ni 9, Nilaini khan LPS Director Pu Lalsawmliana Pachuau Office, Zarkawtah MVA hruaitute leh LPS Vision aiawhten Pro Volleyball League kalpui zel dan tur an ngaihtuah a, kum thum chhung tha taka an thawhho tawhna chhunzawmin kuminah a vawi li nan buatsaih leh ni se tiin inremna an siam a ni.

Kumin hi MVA hruaitu thlan kum a nih avangin pawl pahnihin kum khat chhung atan inremna siam phawt ni se an ti a, kum kal zela Pro Volleyball League kalpui dan tur chu hruaitu tharte leh LPS lamin a tharin indawrna kalpui se tiin an rel nghal bawk.

Pro Volleyball League vawi lina hi March thla chaw hnu lamah R Dengthuama Indoor Stadium, Mualpuiah tan tura ruahmanna siam a ni a, tun tumah hian hmeichhia leh under 18 tournament tihtel a ni ang.

Hlawhtling taka Pro Volleyball League vawi thum neih tawhah Electric Veng club Anastasia-in trophy an la hmasa ber a, 2017 leh 2018 kum zawnin Hunthar an champion. Tun tumah hian MVA hnuaia Pro Division team tha pasarih an inel dawn a ni.

Vawiinah tho MVA hruaitute chuan a office-ah Sports Minister thar Pu Robert Romawia hmuin an pawl hmingin duhsakna an hlan bakah chibai an buk a, an mamawhte an thlen nghal bawk.

MVA chuan Minister hnenah hian sum lama harsatna an tawk mek sawipuiin anmahni puala Indoor Stadium changtlung tak neih ngei an duh thu an thlen a, Pu Robert Romawia chuan theihtawp chhuaha hmalakpui a intiam a, a lakah beiseina an nei sang hle a ni.

MVA hruaitute hian an adviser Pu R Lalzirliana an tlawh nghal bawk a, sorkar tharah cabinet minister a nih avangin lawmpuina an hlan a, an mamawhte thlen nghalin Minister hian a tihtheih chinah hmalakpui ngei a tum thu sawiin eng lai pawhin a inhawng reng tih a hrilh a, thlamuanthlak an ti hle a ni.

Copyright © inkhel.com 2024. All rights reserved.