Pro Fight kalpui zel turin ruahmanna siam a ni

18th March 2019, 04:03AM

Yodha 4x4 Pickup LPS Pro Fight Organising Committee chuan Lightweight Title Fight zir chiang turin member panga awmna Study Group a din a, Pro Fight kalpui zel turin ruahmanna a siam thar bawk.

Pro Fight kal zel dan tur meeting-ah hi Chairman Pu Lalsawmliana Pachuau chuan kaihruaiin LPS Office-ah Organising Committee-in Pro Fight vawi riatna neih zawh tak a thlir let. Lightweight Title Fight thutlukna chungchanga sawiselna leh lehkha lut bakah buaina awm chungchanga hmalak dan tur a rel.

Title fight zan Lightweight-ah champion lai Lalrinawma'n split decision-in Vanlalawmpuia a hneh a, thutluknaa lungawi lo mipuiin buaina chawk chhuakin eng emaw chen show a khaihlak.

Awmpuia lamtang Khuangthing Welfare Committee chuan judge-te thutlukna pawm harsa an tih thu Organising Commitee-ah thlenin result ennawn leh turin an ngen. He inhnek thutlukna avang hian buaina a chhuah bakah social media-ah sawiselna a nasa hle a ni.

Lightweight Title Fight video ngun taka ennawna zir chiang tur team siam a ni a. Mi thenkhat ngenna leh Mizoram boxing kal zelna tura thil tha leh LPS Vision tan pawh thil tha zawk tura ngaih a nih avangin Pro Fight titawp lova kalpui zel turin ruahmanna an siam.

Lightweight Title Fight ennawn leh turin member panga awmna Study Group din a ni a, national referee & judge pathum bakah MIZBA leh LPS aiawh pakhat ve ve ruat a ni.

Anni hian ngun takin inhnek video an ennawn hnuah an hmuh dan fel fai takin report an siam dawn a, Title Fight zana buaina chhuah dan an zir chiang nghal bawk ang. March 25 ral hmain an zir chianna an theh lut tur a ni a, an thu thlen atangin Organising Committee-in kal zel dan tur a rel fel ang.

LPS Pro Fight kalpui zel turin ruahmanna an siam a, pawl pahnihin mawhphurhna mumal zawkin an insem. LPS Vision-in championship huaihawtna atana thil tul zawng zawng (organising & management) a buapui ang a, Mizoram Boxing Association-in referee leh judge bakah technical lamah mawhphurhna pumhlum a la ve thung dawn a ni.

A ngai anga kalpui a nih chuan tihtawp mai theih a nih laiin technical lamah hmasawnna a awm theih nan result puan a nih rualin judge hming lam tel thin a ni tawh dawn a, round of 16 atangin a tul angin state dang judge tel thei tura tih a ni bawk.

Copyright © inkhel.com 2024. All rights reserved.