03 Feb 2019 12:51

inkhel

Pro Fight-ah State paruk boxer tha an innuai dawn

Tata Motors Yodha 4x4 LPS Pro Fight-ah Mizoram nen India hmar chhak state paruk boxer tha an inlan dawn. February ni 5 zanah tanin March ni 12 zanah 'Title Fight' hmangin khar a ni dawn a, R Dengthuama Indoor Stadium, Mualpuiah vek khelh a ni ang.

Mizorama cheng leh zo hnahthlak tan Pro Fight buatsaih thin a ni. A vawi khat nan state dang boxer tha sawm an ni a, Arunachal Pradesh leh Meghalaya atangin boxer pathum ve ve, Manipur, Assam leh Sikkim atangin boxer pahnih theuh an tel dawn.

Sawm bik state dang a tang a tel tur te hi hi an mahni state championship-a medal la tawh an nih loh pawhin national championship-a tel phak an nih a ngai. State dang panga atangin 12 an tel dawn a, weight lian pahnih middle leh lightheavy-a inlan tur an awm lo va, lightfly, bantam leh light-ah boxer pali theuh an tel thung dawn a ni.

Manipur boxer-in ngaihven an hlawh a, bantam-ah W Alexander leh light-ah Khoinaijam S Singh an tel dawn. Khoinaijam hi Manipur lightweight champion lai a ni a, Govt Complex boxer Lalrinawma kut atangin kawnghren chhuhsak tumin a inhnek ang.

Assam atangin 2016 Senior National-a tel ve ve Rubul Mirdha (lightfly) leh Abdul Mannan (bantam) an tel dawn a, Sikkim atangin Raj (lightfly) leh Suk Raj Rai (light) an inlan dawn bawk a, an thlen chin tur erawh hriatthiam a har hle.

Meghalaya atangin Elite National Championship-a tawn hriat nei tha mi pathum an tel dawn a, Shillong boxer vek an ni. Lightfly-ah Meghalaya No. 1 Pynskhern L Nonglait, bantam-ah Justerwell Jyrwa leh light-ah Elite National-a vawi thum khel tawh Dondor Marwein chuan Mizo leilungah fiahna an hmachhawn ang.

Arunachal Pradesh an phur viau a, a vawi khat nan Aizawla inhnek turin boxer pathum an feh chhuak ang. Heli Tana Tara (lightfly), Kogam Potom (bantam) leh Poken Siga (light) te hi national senior-a tawn hriat nei vek tawh niin Tara hi 2017 state champiob a ni a, Potom leh Siga vawi hnih state-ah an champion tawh a ni.

State panga atanga Pro Fight-a tel turte hian round of 16 atangin an khel tan ang. Tripura leh Nagaland-in sawmna an tihlawhtling thei lo ve thung a, chuti chungin Mizoram nen state paruk boxer thaten title an inchuh dawn a, Organising Committee chuan a hma aia inelna sang leh hlawhtling zawk a nih ngei a beisei.

Mizo boxer 194 ziah luh an ni a, hunin a zir loh avangin tum dang aiin an tlem zawk viau a, chutih rualin Mizo boxer tan championship pawimawh tak leh fiahna tling a ni dawn.

Champion lai tel lovin state dang boxer nen 206 an tel dawn. Lightheavy-ah pali chiah ziah luh an ni a, middle-ah 19 awmin hmar chhakah pa lian boxer an tam lo tih a lang. Mizoram ang thovin hmar chhak state dang pawhin pa lian boxer an tlachham a, weight lian pahnihah hian state dang boxer an tel ve dawn lo a ni.

Tun tuma Pro Fight khel tur zingah lightfly champion lai NT Lalbiakkima a thleng sang ber. Siaha fighter hian 2016 Olympics champion Hasanboy Dusmatov a hneh tawh a, elite national-ah Mizoram tan silver medal a hneh chhuak bawk. Ani ang bawk hian lightheavy champion HC Vanhlimpuia chuan elite national-ah silver a awrh tawh a ni.

Bantam champion Zonuntluanga (Dinthar) leh Zarzoliana (Sawleng) chu Assam Regiment boxer ve ve an ni a, Pro Fight hnuhnung berah Rinawma'n Anthony Lalduhawma kalsan light title tlahlang a rochun ve thung.

Pro Fight vawi riatnaah hian Zothan Autoworks chu title sponsor an ni a, an duh angin championship hming atan Tata Motors Yodha 4x4 Pick-up LPS Pro Fight tia thlak a ni.

Thansanga & Sons Auto Division Yamaha Racing, KT Enterprise Panasonic, GIG Motors Maruti-Suzuki, D-3 Business Enterprise, RFL Plastic, Joseph Construction leh Social Welfare Department chuan co-sponsor an chang.

RC Shirt House chuan official-te thawmhnaw tumsak lehin 2009-a Pro Fight kalpui a nih atangin official shirt sponsor an la ni char char a, a vawi khat nan Pro Sound-in light & Sound an tum ve thung dawn a ni.