20 Jan 2019 12:52

inkhel

Pro Fight-ah Boxer 380 chuang an tel dawn

Zothan Autoworks LPS Pro Fight-ah Mizo boxer 380 chuangin tel tumin entry form an theh lut a, India hmar chhak state dang pasarih atangin boxer tha tel tura beisei a ni bawk.

Kum kal ta khan Mizo boxer 310 chuangin tel tumin form an theh lut tawh a. Tan hun sawn hlat a nih avangin ni ruk chhung tel duh si form la theh lut lo tan hun hawn leh niin, inrinniah khar a ni a, boxer 70-in form an theh luh belh leh.

Pro Fight vawi riatnaah hian a vawi khat nan India hmar chhak state dangte sawm an ni a. Manipur, Assam, Meghalaya atangin weight hrang pangaah boxer pakhat theuh tel thei tura tih an ni a, tel tur zat chiah hriat ni rih lo mah se state pathum hian an boxer tha tirh chhuah ngei erawh an tum tih Organising Committee an hriattir tawh a ni.

Mizoram Boxing Association Secretary General leh Boxing Federation of India Joint Secretary Dr Lalrozama (IAS) chuan state dang pali - Nagaland, Tripura, Sikkim leh Arunachal Pradesh a dawr mek bawk. Anni hian weight hrang panga atangin an neih thatnaah boxer pahnih theuh an tir thei dawn a ni.

Hmar chhak state dang atanga boxer lo kalte hi Mizoram Boxing Association-in an buaipui ang a, sum leh pai senso erawh Organising Committee-in a tum vek ang.

Pro Fight hnuhnung ber 2017 khan champion lai tel lovin boxer 289 ziah luh an ni a, tun tumah hian tel tur zat a la hriat theih loh. January 31-ah Hawla Indoor Stadium, Republic Vengthlangah inbuk leh medical test neih tur a ni a, hetah hian hmar chhak state dang atanga tel turte a hriatchian theih nghal bawk ang.

2009 atangin Pro Fight buatsaih a ni a, tun tumah hian a vawi khat nan lawmman pawisa fai tihpun a ni a, weight tina champion theuhin Rs 50,000 an dawng ang. A vaiin Rs 4,40,000 sem chhuah a ni dawn a, a hma aiin 18.92%-in a tam.

Siaha chhuanvawr leh Mizo boxer awm mek zinga thleng sang ber NT Lalbiakkima chuan lightflyweight kawnghren humhim ngei a inringtawk a, 2014 atangin vawi li a champion zawn mek a ni.

Bantam-ah Dinthar fighter Zonuntluanga chu champion lai a ni a, a tum thum nan champion tumin a inlan ang. Light-ah 2017 khan a vawi khat nan Govt Complex boxer Lalrinawma a champion a, a vawi khat nan title humhim a tum dawn a ni.

Middleweight-ah Sawleng fighter Zarzolina'n a vawi nga nan champion a tum dawn a. Weight then hrang pahniha champion thei awm chhun Tuipui fighter HC Johnkenty Vanhlimpuia'n lightheavy-ah kum thum a zawna champion tumin title fight a hmachhawn ve thung ang.

February 5-ah R Dengthuama Indoor Stadium, Mualpuiah tan tur a ni a, a hawnnaah khuallian turin Sports Minister Pu Robert Romawia Royte beisei a ni a, a kharna leh Title Fight-ah Chief Minister Pu Zoramthanga chu khuallian tura beisei a ni bawk.

(adsbygoogle = window.adsbygoogle || []).push({});