Sunday zan khan Premier League inkhelah Manchester United chuan Everton an tlawh a, si thum faiin khual mualah United hi an chak.

Merseyside-ah hian United tan Alejandro Garnacho, Marcus Rashford leh Anthony Martial te chuan goal khat theuh an khung a, United hian point 3 an hlawhchhuak.

Khelh 13 atangin United hian point 24 an hlawhchhuak tawh a, paruknaah awmin, Everton hi point paihsak an nih avangin 19-naah an la awm zel a, khelh 13 atangin point 4 bak an la nei lo.

United hian inkhelh tan atanga minute hnih a liam awrh hnuah goal an khung nghal a, Diogo Dalot-a ball cross chu Garnacho chuan mawi lutukin goal-ah a lo  back volley lut a, tun season-a a Premier League goal hmasa ber hmangin kum 19 mi hian United hma a hruaipui.

Second half-a minute sawm vel an khelhin Martial chu box chhunga Ashley Young-a’n titlu in, VAR-a en a nih hnuah United hian penalty an hlawhchhuak a, Rashford chuan penalty hi goal-ah chan tirin, si hnih faiin United in hma an hruai.

75mins-ah United goal thumna a lut a, Bruno Fernandes-a’n through ball tha tak a pek chu Martial chuan box chhung atangin goal-ah a pet lut a, United hi hnehna pawimawh tak an chang a ni.