Trent Alexander-Arnold chu 2019-20 season chhunga Premier League Young Player of the Year atan an thlang.
Liverpool right-back Trent Alexander-Arnold hian kumin October thlaah hian kum 21 a tling dawn a, tun season hman zawh takah khan Reds chu kum 30 chhunga a vawi khatna atan Premier League title a lakpui a ni.
Tun season chhung khan league game 38 an khelhah Alexander-Arnold hi a tel kim vek a, hengah hian goal 4 a thun bakah mi goal thun tur vawi 13 zet a siamsak a. Mi goal thun tur siamsak kawngah hian tluk loh pakhat chiah a nei a, Manchester City playmaker Kevin De Bruyne a pha ta lo a ni.
Liverpool khaw chhuak Alexander-Arnold hian free kick atangin goal thum a thun a, heng zinga vawi hnih hi Chelsea nen vawi hnih an inkhelh tum, Anfield leh Stamford Bridge-a a thun te an ni a, Leicester City lakah a thun bawk a ni.
Alexander-Arnold hian tun season tluan khan vawi 382 zet chu ball a cross a, Jurgen Klopp-a enkawl Liverpool chuan game 12 chu goal an chhuah lo a, hei hi tlar hnung lampang an chet that vang a tih loh theih loh a ni.
Premier League Young Player of the Year dawng tur hian Trent Alexander-Arnold chuan Manchester United player pathum - Marcus Rashford, Anthony Martial leh Mason Greenwood te bakah Chelsea player pahnih - Christian Pulisic leh Mason Mount te, Dean Henderson leh Jack Grealish te chu a khum a ni.
He chawimawina dawng thei tura chhawp chhuahte atang hian football ngainatute leh football lampang hre mite chuan vote an thlak a. 2019-20 season tan dawna player kum 23 aia upa lo zinga tha an tih ber an thlang a, hengah hian Alexander-Arnold hian vote a hmu hnem ber a ni.
Chawimawina dawng tura an thlan tlin hnuah hian Trent Alexander-Arnold chuan social media lamah a lawm zia a puangzar a, a lawmthu sawina hi a tawi ren rawn hle a, ‘Proud’ tih chiah a ziak a ni.
Young Player of the Year atana thlan a nih bakah hian Player of the Year dawng thei tura chhawp chhuah zingah pawh a tel a. A team-mate Sadio Mane leh Football Writers’ Association chawimawina dawngtu Jordan Henderson te chu a elpui turte niin, anni bakah hian Kevin De Bruyne, Nick Pope, Danny Ings leh Golden Boot dawngtu Jamie Vardy te chu an chhawp chhuak bawk a ni.