Manchester City midfielder Phil Foden chu tun season Premier League Young Player of the Season atana thlan a ni.

Season hmasa pawh khan kum 21 mi Foden hi Premier League Young Player of the Season atana thlan a lo ni tawh a, a kum zawnin English midfielder hi Premier League Young Player of the Season atana thlan a ni.

Season kal mekah Foden hian Premier League-ah goal 9 khung tawhin, assist 5 a nei tawh bawk a, minute 2,043 khel tawhin, minute 146 dana goal emaw assist emaw neih ziah ang a ni.

Foden chuan, “He chawimawina a zawna ka dawng thei hi a chhuanawm ka ti hle a, Premier League-ah hian player naupang tha tak tak an tam a, hetianga thlan ka ni leh hi a lawmawm ka ti takzet a ni,” tiin Premier League Young Player of the Season lawmman a dawn chungchang a sawi.

Kumin Premier League Young Player of the Season lawmman dawng thei tur hian player 8 thlan chhuah an ni a, Foden bakah hian Trent Alexander-Arnold, Conor Gallagher, Tyrick Mitchell, Mason Mount, Aaron Ramsdale, Declan Rice leh Bukayo Saka te chu nominate an ni.