Premier League tan hun hi a hma mah mah: Lampard

03rd August 2020, 03:08PM

Chelsea manager Frank Lampard chuan Premier League season tan hun September ni 12 chu a hma lutuk niin a sawia, player te inhliam tur ven nan chawlh pek an mamawh niin English manager hian a sawi.

Chelsea hian an game hnuhnung berah Arsenal chu FA Cup final-ah an hneh lova, he inkhelah hian Chelsea player pawimawh pahnih Cesar Azpilicueta leh Christian Pulisic te chu hamstring injury avangin an inkhel chhunzawm thei lova, lakchhuah an ni.

Chelsea hian Inrinni lo awm tur zanlaiah hian UEFA Champions League round of 16 second-leg an khel dawna, first leg-ah 3-0 a an hneh loh tawh Bayern Munich an tlawh dawn.

Chelsea hi an tlang a rinawm loh hle a, an tlang lo a nih pawhin, he game atang hian ni 35 bak Premier Legaue season thar tan hma in hun an nei dawn lo. Final thleng hlauh ta ang sela, ni 20 chiah an nei dawn tihna a ni bawk.

Champions League leh Europa League la khel tur te hi an season tan hun tur hi tihtlai sak hret an nih a rinawma, Quarter Final khel tur te pawh midang ruala season bul an tan a rinawm loh.

Lampard chuan, “Kan season intan hun tur hi min hrilh turah ka ngai a, chu chu Bayern Munich laka kan tlang leh tlang lovin a hril dawn. Tuna season tan hun hi chu Bayern laka kan tlang phei chuan a fuh lo hle a, player-te hian chawlh an mamawha, Premier League hautak zia ngaihtuah phei chuan chawlh pek an ngai hle.

“A chhe ber dawnin, Bayern lakah chak lo ta pawh ni ila, ni 12-a tan hi chu player te tan a la hma mah mah ka ti tho. Player te hian chawlh hahdam an mamawha, heng avang hian hamstring injury pahnih ka neih phaha, inkhel laklawh laia lakchhuah kan inngaih phah a ni,” a ti.

Copyright © inkhel.com 2024. All rights reserved.