23 Feb 2018 10:20

digimalt

​Premier League striker tha 10

Kum 1992 atang khan English Premier League khelh tan a ni a, English football khelh dan dik takin an kalpui chho a, hetih lai hian foreign atangin player tha leh coach tha an lut chho zel a, tunah chuan game tactic chi hrang hrang hmun tur a awm ta.

Kum 2000 hmalamah kha chuan Italian league a ropui em em, chutih laiin TV leh media lamah Premier League hi an tang em em a, vawiinah chuan sum tamna ber leh khawvel mipui en hlawh ber a ni ta. Game physical tak khelh a nih thin avangin league danga goal khung teuh, mahse Premier League-a khung hleithei lo sawi tur an awm teuh, chuta tang chuan league harsa tak a ni tih a chiang.

Game an khel tlem emaw tam emaw; kum 1992 atanga vawiinni thlenga English Premier League striker tha 10 tarlang ila.

10. Ian Wright

Player thinchhe tak a ni a, Arsenal-a ropui taka a khelh zawhah West Ham a pan, hetah hian a chhe zawngin hming a chher hle, Leeds United nen an inkhelh tumin referee Rob Harris-a'n a hnawhchhuak, a thinur chuan dressing room a tichhe nual, match thum lai hrem a ni. Hetih lai hian a finishing that em em avang zawkin khawvel chuan an hre reng ta a nih hi.

Kum 1991 atanga 1998 thleng Arsenal tan a khel, Gunners tan game 221 lai khelin goal 128 a khung tling. Premier League game 213 atangin goal 113 a khung a, League title pakhat lain game khatah goal 0.53 ang zel khung ang a ni.

9. Ruud van Nistelrooy

A khup hliam chung chungin Sir Alex Ferguson chuan PSV atangin Old Trafford-ah a lalut, a tifuh chiang kher mai. Ruud chuan, "Ka hliam khan rilru lamah paukhauhna min pe, ka inhliam hmain chutiang chu ka nei ngai lo," a ti a nih kha.

United tan a season khatnaah PFA Players' Player of the Year atan an thlang nghal. League goal 25 a khung nghal pang a, Premier League golden boot a dawng nghe nghe. A season khatnaah United tan competition hrang hrangah goal 44 lai a khung a ni.

United tan Premier League game 150 khelin goal 95 a khung tling a, United-ah season 5 a cham chhungin league title 1 a hlawhchhuak, game tin goal 0.63 khung ang a ni. Ronaldo chuan Real Madrid a pan a, Sir Alex Ferguson-a nen an karthu a tha lo bawk nen, a chhuak ve ta a ni.

8. Didier Drogba

Kum 2004 khan Chelsea chuan £24m in Marseille atangin Drogba hi an lalut, a season khatnaah a che hleithei lo, a chak si, a tlan fua fua, mahse a finishing a tawih lo bawk nen, a goal khung duh luatah a dive thul, sawisel pawh a hlawh hle.

Hetih lai hian an coach kha Jose Mourinho a ni miau a, goal a rawn khung chho ta tak tak a, league title a la chho ta mawlh mawlh, Chelsea-in league title an laknaah khan a meizang hlaptu ber a ni ziah. 2009/10 season-ah phei kha chuan goal 29 lai a khung. Premier League game 254 atangin goal 104 a khung a, league title 4 lain game khata goal 0.41 khung ang zel a ni.

7. Luis Suarez

Kum 2011 January thla khan Liverpool chuan Luis Suarez leh Andy Carroll an lei, Suarez kha £22.8m man a ni a, Carroll kha £35m man a ni, a hnuah tunge ropui zawk chu sawi kher a ngai lovang chu. Ajax-ah mi a seh avangin a hming a chhe hle, World Cup 2010-ah Ghana an tum tumin a goal tur a lo bengthla bawk. Hmingchhe deuh chungin Anfield a pan a nih kha.

2011/12 season khan league goal 11 khungin woodwork vawi 8 lai a pet per bawk. Patrice Evra nen an karthu avangin rei tak hrem a nih bakah Chelsea defender Ivanovic a seh avangin hrem a ni bawk. Arsenal chuan to taka leichhuah tum mahse Liverpool-ah a cham chhunzawm zel a, 2012/13 season-ah khan goal 23 a khung.

Liverpool a chhuahsan hma chiah khan league game 33 atangin goal 31 a khung hem mai, Liverpool kha Brendan-a hnuaiah an champion teuh kher mai, Gerrard a tawlhthlu hlauh a, an champion ta lo a nih kha. PFA Player of the Year dawngin European Golden Shoe a dawng bawk a, kum 2014 khan Barcelona a pan ta a ni. League game 110 atangin goal 69 a khung a, title a la lo, game khata goal 0.63 khung zel ang a ni.

6. Dennis Bergkamp

Arsenal i tan emaw tan lo emaw, The Non-Flying Dutchman hi a khel i hmu ve phak a nih chuan thiam i tih ber zing ami a ni ve ngei ang. Arsenal tan Premier League title 3 a la a, league game 315 khelin goal erawh 87 a khung, game khatah goal 0.28 khung ziah ang ni mahse assist erawh a nei turu hle, game 315 atangin assist vawi 94 lai a nei hem mai.

1997/98 season khan league game 28 atangin goal 16 a khung a, PFA Players' Player of the Year atana thlan a ni. Kum 1998 khan Ian Wright-a hovin league title an la a, 2002-ah Henry-a hovin an la leh a, 2003/04 khan invincible team dinin ropui takin league title an la.

Kum 2002-a Newcastle United lama a pet goal dan turu tak kha chu Premier League History-a goal class ber a la ni hial awm e. Arsenal khan Inter Milan atangin £7.5 million in an lalut, khami tum khan Nottingham Forest full-back ni thin Stuart Pearce chuan to a ti mah mah, The Sun-in a interview naah Bergkamp ai chuan Stan Collymore a thlan zawk fe thu a sawi, mahse tunge tha zawk tih chu khuareiin a hrilh ta a ni.

5. Wayne Rooney

October 2002 a ni a, Everton chuan Arsenal an hmachhawn. Kum 16 mi Rooney chuan mawi lutukin Gunners lamah a pet goal, commentator chuan, "A hming hi lo chhinchhiah ru, Wayne Rooney a ni e," tiin a puang a nih kha. Vawiinah chuan Premier League goal khung hnem ber dawttu a ni mek.

Kum 2004 khan Sir Alex Ferguson chuan Old Trafford-ah a lalut, kum 13 lai United tan khelin league title 5 ngawt a hlawhchhuak. Premier League game 482 khel tawhin goal 208 a khung tling tawh a, game khata goal 0.43 khung zel ang a ni.

Kum 2010 khan United tan League title 5-na lain PFA Players’ Player of the Year atana thlan a ni bawk. Ani aia goal khung hnem Premier League-ah pakhat chiah a awm, chu chu Alan Shearer niin, ani khan goal 260 a khung tling. Rooney hian United tana a khelh chhungin assist vawi 100 aia tam a nei a, ani aia assist nei tam chu Ryan Giggs, Cesc Fabregas leh Frank Lampard te chiah an ni.

4. Sergio Aguero

"Defender te hian min han en a, te min ti hle thin. Chutah min han tackle a, mahse ka tlansa ta daih thin a," tiin Aguero chuan a sawi. He Argentine striker hi kum 29 mi a ni ve tawh, a tlahniam chho mek nia ngaih a nih laiin tun season-ah league goal 21 a khung tling leh ta der mai. Ani aia khung tam chu Harry Kane leh Salah chiah niin Kane hian goal 23 ak khung tling tawh a, Salah hian goal 22 a khung tling tawh bawk.

Tottenham striker Harry Kane leh Arsenal striker Thierry Henry te chiah hi goals per game ratio-a Aguero khing thei an ni tlawng mai, minute 108 dana goal khung ziah ang a ni mek. Premier League game 203 atangin goal 143 a khung tling tawh. City chu league title 2 lakpui tawhin game khata goal 0.70 khung zel ang a ni mek e.

3. Eric Cantona

Kum 1995 khan Selhurst Park-ah Cantona hian Crystal Palace fan pakhat a kungfu kick hmiah a nih kha, rei tak hrem a ni nghe nghe. Khami tum khan Cantona chuan ka la tlawh na lo mah mah a la ti chheu chheu mai. Hming hliauna lian tak nei mahse United tana team ropui dinna kawngah player pawimawh ber a ni a.

Kum 1992 atanga kum 1997 chhung Manchester United tan khelin league title vawi 4 a la. United tan Premier League game 156 khelin goal 70 a khung a, game khata goal 0.45 khung zel ang a ni. Kum 31 mi lek niin United atangin football a chawlhsan a, vawiin thlengin a zunzam chuan United fans a la zem a thei hial a ni.

2. Alan Shearer

1994/95 season khan Blackburn Rovers chu Alan Shearer hian Premier League title a lakpui, hemi hnu hian Newcastle United a pan ta a, league title vawi khat bak a la ta lo a ni. League title a lak lohna club Newcastle United tan goal a khung hnem ber bawk a. Shearer hian Premier League game 441 atangin goal 260 a khung a, game khatah goal 0.59 khung ziah ang a ni.

English striker piang tawh zingah chuan goal khung thei ber ni hiala sawi a ni a, kum 1996 khan Blackburn a champion pui hnu lawkah Newcastle United chuan khawvela player manto ber ni turin £15 million in an dawr hem mai. Rovers neitupa Jack Walker chuan a ui tak zet, Shearer chu cham turin chelh a tum, kum 25 mi lek ni mahse player-manager ni turin a sawm hial, mahse Shearer chuan Newcastle a pan ta. Kum 2006 khan football chawlhsanin Magpies tan league goal 148 a khung a, Premier League-ah hattrick vawi 11 a siam tling bawk.

1. Thierry Henry

Premier League-a goal khung khawl ropui ber tiin sawi ila kan sawi sual awm love. Khawi hmun atang pawhin Henry hian goal a khung thei emaw tih mai tur hi a ni a, a goal khung dante hi a awlsam hmel thei bik em em bawk nen, Premier League game 258 atangin goal 175 a khung a, league title vawi 2 laiin game khatah goal 0.68 khung zel ang a ni.

Henry hi Premier League goal khung hnem zingah 5-na chiah ni mahse kum 8 chiah Premier League a khel a, Barcelona a pan hnuah New York Red Bulls a zawm leh a, kum 2012 khan Arsenal chu loan-in zawm leh mahse match 4 chiah a khel a, goal 1 a khung leh hram bawk.

2001/02 season khan league goal 24 khungin north Londoners chu league title a lakpui a, 2002/03-ah goal 24 a khung a, 2003/04-ah goal 30 a khung tling hial. 2004/05-ah goal 25 khung lehin 2005/06 season-ah goal 27 a khung a, season 5 chhung ngawt goal 20 aia tam a khung ziah. Arsenal invincible team-ah khan player pawimawh ber a ni nghe nghe a ni.

Rank souce : FFT