26 Sep 2019 05:27

inkhel

Premier League season-a assist ngah zualte

Inkhelah chuan goal thuntute hi kan dah pawimawh ber fo a, heti a nih rual hian goal an thun theihna atana tangkai tak, an thiante chu theihnghilh chi an ni hauh lo a ni.

Player tam tak chuan goal an thun ve vak lem lo a, hetih rual hian an thiante goal thun tur an siamsak hnem viau thung a, goal thuntu leh a siamtute chu huang khata dah loh theih an ni lo a, a pawimawh bik sawi theih a ni lo.

Premier League huang bikah ringawt pawh player thenkhat chuan mi goal thun tur vawi 100 chuang zet an siamsak hman a. Season khat chhunga mi goal thun tur vawi 20 siamsak thei hi pakhat chiah a la awm a, chutiang tlin teuh deuh pali an awm tawh bawk a ni.

Thierry Henry - 20 (2002-03)
Arsenal forward Thierry Henry thatzia kan hria a, goal a thun thei em em a, chumi piah lamah mi goal thun tur a siamsak hnem viau bawk a. Premier League chanchinah season khata mi goal thun tur vawi 20 siamsak tling awm chhun a la ni reng a ni.

2002-03 season-ah khan French striker Thierry Henry chuan mi goal thun tur vawi 20 a siamsak bakah amah hian goal 24 zet a thun bawk a. Arsene Wenger leh a pawlte chuan Premier League title an la a, Henry hi PFA Player’s Player leh FWA Footballer of the Year atan an thlang zui a. Kum 17 a ral leh hnuah pawh season khata vawi 20 assist nei thei dang hi an la awm miah lo a ni.

Mesut Ozil - 19 (2015-16)
German playmaker hi tun hnaiah an sawisel nasa hle a, hetih lai hian Premier League season khat chhunga assist ngah ber dawttu a ni thei tlat thung. 2013 kumah khan Emirates Stadium a luhchilh tan a, hemi atang hian kum eng emaw zat chhung chu boruak a nei tha chho hle.

Arsenal jersey ha chunga a chet that ve ber chu 2015-16 season kha a tih theih a, a thiante goal thun tur vawi 19 zet mai a siamsak a, an club Player of the Year atan an thlang nghe nghe a ni.

Ozil hi league pathuma season khata assist ngah ber ni thei awm chhun a la ni a, Bundesliga (2009-10), La Liga (2011-12) leh Premier League (2015-16) ah te mi goal thun tur siamsak hnem ber hi a ni tawh a ni.

Kevin De Bruyne - 18 (2016-17)
Chelsea tan boruak a nei lian vak lo a, Manchester City lam a pan hnuah erawh Premier League huang chhung mai ni lo, khawvel huapah pawh thawm nei lian berte zinga mi a ni.

De Bruyne chuan Pep Guardiola kaihhruaina hnuaiah hma a sawn nasa hle a nih hmel viau a. Tun hnai lawkah pawh Premier League huanga assist 50 nei rang ber a ni a, game 123 khelhah mi goal thun tur vawi 50 a siam tling a ni.

2016-17 season-ah khan a che tha bawk a, vawi 18 ngawt mai a thiante goal thun tur a siamsak a, Premier League title an la nghe nghe a. Point 100 hmuin Guardiola chuan Premier League title a lak hmasak ber a ni.

Cesc Fabregas - 18 (2014-15)
Fabregas chu Arsenal player naupang ber ni turin an la lut a, kum 16 mi chauh niin midfield-ah chuan an rinrawl deuh ber a ni chho a. Barcelona a pan hmain Arsenal captain te a ni hman hial a ni.

A vawi hnihna atan Premier League lamah a kir leh a, Chelsea a zawm a, Premier League title a lakpui zui a, anmahni hnaih bertu Manchester City aiin point 8 in an sang a, 2014-15 season-ah hian Fabregas chuan mi goal thun tur vawi 18 a siamsak a ni.

Premier League season hnih chhunga season hnih chhung mi goal thun tur vawi 17 aia tam siamsak thei awm chhun a la ni reng a, 2007-2008 ah khan mi goal thun tur vawi 17 a lo siamsak tawh a ni.

Frank Lampard - 18 (2004-15)
Jose Mourinho kaihhruaina hnuaia an season hman hmasak berah Frank Lampard chuan mi goal thun tur vawi 18 zet mai a siamsak a, Premier League title an la zui nghe nghe a. Hemi season-ah hian Lampard chu a chet that em avangin FWA Footballer of the Year a nih bakah Ballon d’Or dawng turin Ronaldinho a tluk ta lo bawk a ni.

Premier League bikah midfielder zinga goal thun hnem ber ni thei Lampard hi 2004-05, 2008-09 leh 2009-10 season-ah te khan mi goal thun tur siamsak hnem ber a ni.