16 Sep 2020 05:37

inkhel

Premier League player hlawh hnem ber Aubameyang

Pierre-Emerick Aubameyang chuan Arsenal-ah kum thum chhung atan contract a ziak thar a, a hlawh a pung chho a, Premier League huanga hlawh hnem ber a nih theih phah dawn a ni.

Arsenal leh Gabon striker kum 31-a upa Pierre-Emerick Aubameyang chuan a hmain Emirates Stadium-ah khan kar khatah £200,000 a hlawh thin a. Contract thar a ziah takah chuan a hlawh pawh kar tin £350,000 a ni tawh dawn a, a hmaa hlawh hnem ber ni thin Mesut Ozil chu a khum thei tawh a ni.

German playmaker Mesut Ozil chu Arsenal player zinga hlawh hnem ber a ni thin a, kar khata a hlawh hi £350,000 niin, Aubameyang pawhin kar tin £350,000 a hlawh dawn a, Gunners captain hi chuan bonus a dawn belh dawn bawk avangin Ozil ai hian a hlawh hnem theih phah dawn a, Premier League player zingah chuan a aia hlawh hnem an awm lo ang.

Manchester United goalkeeper David De Gea pawhin kar khatah £350,000 a hlawh mek a, Mesut Ozil nen hian an hlawh zat a inang chiah a. Manchester City playmaker Kevin De Bruyne chu an hnuai chiahah hian awmin, kar khat chhunga a hlawh hi £320,000 a ni.

Chelsea-in an club record thar siama an lak luh, kum 21-a upa Kai Havertz chu panganaah awmin, kar tin £310,000 a hlawh dawn a. Manchester City lamin parukna an hauh a, 2018 a kum nga chhung atana contract ziaktu, kar khata Raheem Sterling chuan kar khatah £300,000 a hlawh a ni.

Pasarihnaah hian Manchester United midfielder Paul Pogba a awm a, French midfielder hian Old Trafford-ah kar tin £290,000 a hlawh mek a, a hnampui Anthony Martial chuan kar khatah £250,000 a hlawh ve bawk a, pariatnaah a awm a.

Manchester City striker Sergio Aguero chu pakuana niin, Argentine striker hian kar khatah £230,000 a hlawh mek a. Arsenal player thar Willian chu sawmnaah awmin, kar khat chhunga a hlawh hi £220,000 a ni.