26 Nov 2018 08:26

inkhel

Premier League leh NBA player hlawh a inthlau

NBA chu khawvela league hrang hrang awm zinga player te hlawh an pek sanna ber a ni a, Premier League player te hlawh lak nen chuan a inthlau hle.

Khawvela infiamna peng hrang hranga league lian zuala player te hlawh pek hnem chungchangah NBA chu a chungnung ber a ni a, Indian Premier League chu pahnihnaah awmin, Major League Baseball chu pathumna a ni a, English Premier League chu palina a ni.

Manchester United chu player te hlawh pe hnem 10 zinga Premier League atanga Top 10 kai awm chhun an ni a, NBA team 6 ngawt an lang pha thung.

Barcelona chu player te hlawh atana pawisa seng hnem ber an ni a, Real Madrid chu pahnihnaah an awm a, an hnuaiah hian NBA team ho an intlar a, Oklahoma City Thunder chu pathumna niin, Golden State Warriors, Washington Wizards, Toronto Raptors, Houston Rockets leh Miami Heat te chu an indawt thla a. Juventus chu pakuanaah awmin Manchester United chu sawmnaah an awm bawk.

Kum khat chhungin NBA player te chuan chawh rualin £5,905,912 vel hlawh ang an ni a, hemi hun chhunga Premier League player te hlawh chawh rual chu £3,953,197 a ni thung.

Oklahoma City Thunder chuan season khat chhungin an player pakhat hlawh atan £7,848,811 vel pe chhuak ang an ni a, NBA team zingah chuan hlawh pe sang ber an ni mek a. Atlanta Hawks chu NBA team zinga hlawh pe tlem ber niin, season khat chhungin player pakhat tan £3,969,785 vel theh chhuak ang an ni.

Premier League club zingah kai thar Cardiff City chu player te hlawh atana seng tlem ber an ni a, Cardiff hian season khat chhungin player pakhat hlawh atan hian £957,471 vel an seng a. Hetih lai hian Manchester United chuan season khatah player pakhat tan £6,534,654 vel zet an seng thung.

Highest Paid Sports Leagues:

1. NBA - £5,905,912

2. IPL - £5,058,901

3. MLB - £3,429,676

4. Premier League - £2,990,726