Premier League leh De Bruyne chungchangah Kompany tawngchhuak

20th June 2015, 03:06AM

Manchester City skipper Vincent Kompany chuan Chelsea atanga league title lalet leh turin hmanrua an neih that tawk thu a sawi.

Kompany chuan season hmasa ah Chelsea chuan champion an phu ber tih a pawm thlap thu sawiin tun nipuia City intuai thar lehna chuan season lehah a champion tir theih ngei a rin thu a sawi bawk.

Tun nipuia City target lian pathum te chu Raheem Sterling, Paul Pogba leh Kevin De Bruyne te an nih thu khawlthlang media te chuan an chhuah chamchi tawha, Kompany chuan an target te atanga en reng reng pawhin champion thei team, team hlauhawm tak nih an tum zia a chiang hle tih a sawi.

De Bruyne chungchang sawi zuiin a hnampui pa nena City tana an khelh dun theih chuan nuam a tih tur thu te, De Bruyne chu game thlak thawk thei khawpa player tha a nih thu te a sawiin, amah sawm kher tul ka ti lova, City zawm leh zawm loh chu a thu thu a ni. Kan bula a khel thei a nih ngat chuan kei tluka lawm an awm lovang tiin Kompany chuan a sawi.

De Bruyne hian Premier League a inkhelh leh a duh thu a lo sawi zauh tawha, amaherawhchu Chelsea a Mourinho a awm chhung chuan Chelsea ah bik kir leh a tum lo tih a sawi tawh bawk. City in an beisei ve mek bawka, De Bruyne hi City tan season lehah a khel kan hmu maithei e.

Copyright © inkhel.com 2024. All rights reserved.