Newcastle United chuan Barcelona forward Ferran Torres lak an tum dawn niin The Sun chuan a tarlang.

Kum 23 mi hian January 2022 khan Manchester City chhuahsanin Barcelona a pan a, Catalan club tan game 87 atangin goal 19 a khung ve tawh.

Barcelona hi sum lamah an la talbuai mek a, an sum dinhmun tihziaawm nan player thenkhat chhuahtir mai pawh an remti chho tan niin Spanish chanchinbute chuan an tarlang mek.

Hetiang dinhmuna an din mek lai hian sum lama harsatna nei lo Magpies chuan Torres hi man to deuh pawh nise lei an hreh lo nia report a ni a, Newcastle United hian Torres hi an la thei a nih chuan Premier League lamah a hmel kan hmu leh thei dawn tihna a ni.

Report thenkhatin an tarlan dan chuan, Torres hian Barcelona-ah beisei a phak lo deuh a, hei vang hian chhuahtir leh mai pawh an hnial lo. 

A man hi £35m vel a nih rin a ni a, Newcastle United hian an squad thawm chak nan tun January transfer window inhawn lai hian lak mai an tum dawn niin The Sun chuan a tarlang a ni.