Brighton & Hove Albion chuan centre-back tha nia sawi hlawh Mykola Matvienko lak luh tumin Shakhtar Donetsk nen inbiakna an kalpui mek niin English media te chuan an tarlang.

Kum 26 mi hi kum rei ve fe Shakhtar tlarhnung khaikhawmtu ber a lo ni tawh a, Kum 2017-a senior team a khelh tan atangin Ukraine aiawhin vawi 52 a fehchhuak tawh. Shahktar boss hlui ni ta Roberto De Zerbi enkawl lai mek Brighton chuan inremna siam tumin hma a la mek niin 90min chuan a tarlang.

Shakhtar lam hian inremnan €25m an phut a, mahse Seagulls lam hian tun dinhmunah €15m aia tam pek an hreh nia tarlan a ni. Chuvang chuan loan ang pawhin inbiakna an kalpui tel bawk.

Brighton chauh hi he defender ngaihventu an ni lo a. Brentford, Leicester City leh West Ham United-te pawhin an ngaihven ve mek bawk. Italy leh Germany atang pawhin Matvienko hian heltu a nei.

90min chuan April 2022 khan Brentford hian Matvienko an ngaihven hle thu an lo tarlang tawh a, Mykhailo Mudryk pawh an lo umzui ve tawh.

Matvienko hi left-back-ah pawh a khel thei a, tun season-ah Shakhtar tan right-back-ah pawh a lo khel zeuh zeuh tawh bawk a ni.