Premier League club te chuan Zirtawpni khan coronavirus avangin tun thla chhung inkhel tihtawp lailawk a nih tur chu inlungrual takin an rela, mahse season kal zel dan turah ngaihdan a inang lo niin English chanchinbu mite chuan an tarlang.

Tunah hian April thla ni 4 thleng chu Premier League inkhel tihtawp tura thutlukna siam a ni a, mahse coronavirus darh zel dan a zirin a hun hi an pawhsei belh lovang tih a sawi theih loh.

April thla ni 4 hnuah pawh inkhel hi chhunzawm a nih theih loh thut chuan nasa takin season kal lai a khailak dawna, season hi khelh zawh theih loh khawpin a khailak lovang tih a sawi theih hauh loh.

Club thenkhat chuan April thlaah hian season chhunzawm theih mai an inbeisei laiin, club thenkhat chuan season tih tawp a tul pawha inralrin tan mai an duh tawh niin chanchinbu mite chuan an ziak.

Sky Sports tarlan danin, Premier League club-a mi hlun tak (hming thup) in a sawi danin, tunah hian 75% velin season hi tihtawp a nih a rinawm thu a sawi niin an tarlang.

He thu sawi chhuak tu in Sky Sports a hrilh danin, “Kar thum hnuah inkhel hi chhunzawm a nih theih ngaihna ka hmu ve lova, thla eng emaw hei hian a awh dawna, season thar pawh a ngaihtuahawm mek zawk.

“Ka hmuhdan chuan 75% velin tun season hi chhunzawm a nih a rinawm lova, mahse hemi chungchangah hian zawhna a tam dawna, tu nge league hniam atanga league sangah kai anga, tu nge league sang zawk atangin league hniam zawkah tla ang tih hi a ni. Season hi tihtawp a nih chuan division hrang hrang pali atang hian club tam tak chu sum lamah an talbuai phah ngei a rinawm,” a ti.