Liverpool chuan Anfield-ah Cardiff City an mikhual a, Liverpool hi 4-1 in an chak a, Premier League-ah hma an hruai theih phah a ni.

Cardiff City tan chuan Anfield-a chak zawk nih chu thil huphurhawm tak a ni chiang mai a, kar hmasaa Fulham an hneh theih avangin inrintawkna sang tak erawh an nei ngei ang a. Mahse, Cardiff hian December 1959 hnuah Liverpool hi Anfield-ah an la hneh leh ta miah lo a, hemi tum hian Cardiff hi 4-0 in an chak a ni.

Neil Warnock chuan kar hmasaa Fulham an hneh tuma a khelhtir zinga pakhat chauh a thlak danglam a, Harry Arter chu inhliam vangin a tel thei lo a, a aiah Junior Holiett chu a lut a. Holiett hi October thla tira Tottenham an hneh loh hnua a inlan leh hmasak ber a ni.

Jurgen Klopp chuan kar tir lamah UEFA Champions League a Red Star Belgrade an hneh tuma khel pathum a thlak a, Joe Gomez, Andrew Robertson leh Xherdan Shaqiri te chu a chawlhtir a, an aiah Alberto Moreno, Dejan Lovren leh Adam Lallana te chu a luhtir thung.

Liverpool XI (4-3-3): Alisson; Trent Alexander-Arnold, Dejan Lovren, Virgil van Dijk, Alberto Moreno; Georginio Wijnaldum, Fabinho, Adam Lallana; Mohamed Salah, Roberto Firmino, Sadio Mane

Subs: Simon Mignolet, Xherdan Shaqiri, Daniel Sturridge, Joel Matip, Joe Gomez, Andrew Robertson, James Milner

Cardiff XI (4-4-1-1): Neil Etheridge; Bruno Ecuele Manga, Sean Morrison, Sol Bamba, Joel Bennett; Junior Holiett, Victor Camarasa, Aron Gunnarsson, Josh Murphy; Bobby Reid; Callum Paterson

Subs: Alex Smithies, Gary Madine, Loic Damour, Matthew Connolly, Kenneth Zohore, Greg Cunningham, Kadeem Harris

Inkhelh tan phat atangin Reds chuan inkhel an thunun nghal a, ball pawh an chang hnem zawk daih a. Bluebirds boss Warnock chuan a hmain Anfield-a chak chu thil theih loh tluk a nih thu a lo sawi tawh a, a sawi ang deuh hian Cardiff khelh dan atangin chak tur chuan an beiseiawm lo hle.

Liverpool chuan an nawr na nghal bawk a, tan atanga minute 10 lekah goal a lut zui ta reng a.

Trent Alexander-Arnold chuan Cardiff goal lamah ball a vawrh phei a, Sadio Mane leh Georgino Wijnaldum te chuan ball hi an lo pet a, mahse an lo dang zel a. Heta ball kal zel hi Mohamed Salah chuan goal-ah chuan a lo thun a, Liverpool chu hma a hruaipui a.

Mohamed Salah hi Premier League kai thar club laka an game hnuhnung parukah goal 7 ah a inrawlh tawh a, amah hian goal 4 a thun a, mi goal thun tur vawi 3 a siamsak tawh a ni.

Inkhel an chhunzawm leh nghal a, goal luh hnu lawkah Salah ball pek chu Virgil van Dijk chuan a lo tauh a, Cardiff goal ban a per hlauh a. Goal ban an tihper atanga minute 2 hnu velah Salah bawk chuan Cardiff defender te a chhaih buai a, box chhungah Salah chu a tlu a, mahse referee chuan a ham lo a, Egyptian star in penalty hlawh a inbeiseina chu a thamral a.

First half laihawl vel atangin Cardiff chu tlemin an che ve ta deuh a, mahse heti chung hian Liverpool chuan 85% vel chu ball an chang tho a. Han innawr ngial mahse goal dang erawh a luh belh thei ta mai lo a. Half time thlen dawnah Alberto Moreno chuan Cardiff goal lamah ball a tauh a, mahse Sean Morrison chuan goal line-ah a lo dang thei hlauh a, half time thlengin Liverpool hian 1-0 in hma an la hruai chhunzawm a.

Second half an khel leh a, first half chhungin Cardiff hian Liverpool box chhungah ball an luhpui miah lo a, second half-ah goal thun an tum a nih chuan insiamthat an ngai hle.

Minute 63-ah Liverpool chuan penalty an beisei leh a, mahse referee te chuan an beisei ang hian an tihsak lo a. Hemi hnu lawkah hian Reds chuan goal an thun ta tho a, Sadio Mane chuan Liverpool goal hnihna a rawn thun a ni.

Mane chuan Cardiff box chhungah ball a luhpui a, Ecuele Manga chuan ball hi a chuhpui a, Mane hian a chang dawn ta lo emaw tih hnuah a la let leh a, goalkeeper Neil Etheridge man hman lohin goal-ah chuan a thun zui a.

Minute 77-ah Cardiff chuan goal an thun ve leh tlat mai a. Liverpool hian goal hnih an thun tawh vangin an ngaih a tha ta deuh nge ni, inkhel boruak pawh a zuai sawt hle a, hetiang a nih lai hian beisei loh takin an khingpuite chuan an si phurh pakhat chu an rawn sut a.

Junior Holiett chuan Liverpool box chhungah ball a pet phei a, hei hi an lo dang per a, Callum Paterson hmaah ball chu a kal fuh hlauh a, Reds goalkeeper Alisson man theih lohin goal-ah chuan a lo thun a, Liverpool hmahruaina chu 2-1 a ni ta.

Callum Paterson goal hi February thlaa West Ham tana Michail Antonio goal thun hnua Liverpool in Anfield-a Premier League goal an chhuah leh hmasak ber a ni.

Minute 81-ah Mohamed Salah chu Joel Bennett chuan a titlu niin a lang a, Salah chuan penalty a beisei leh a, mahse referee chuan ngaihdan dang a nei a, Cardiff defender chu free kick a hlawhtir ta zawk a.

Minute 84-ah Salah chuan Xherdan Shaqiri chu ball a pe a, Shaqiri chuan Reds tana a goal hmasa ber thunin Liverpool chu 3-1 in hma a hruaipui a.

Reds chuan an la duhtawk mai lo a, minute 87-ah goal dang an la thun belh cheu a. Salah bawk chuan Cardiff defence karah Mane chu ball a pe phei a, Mane hian he inkhela a goal hnihna thun turin Etheridge chu a pet khum a, Liverpool chu 4-1 in hma a hruaipui a ni.

Hun tawp thlengin goal dang a awm belh ta lo a, Liverpool chu 4-1 in an chak a, Premier League season hman mekah game 10 chhung chu Liverpool hian hneh loh an nei tawh lo a, he chanchin ziah lai hi chuan Liverpool hi Premier League-ah hmahruaitu an ni.

Liverpool hian an khelh leh hunah Emirates Stadium-ah Arsenal an luhchilh dawn a, tun hnaia che tha em em ve ve an nih avangin inkhel hmuhnawm tak en tur a awm ngei a rinawm hle a. Thawhtan zan hian Manchester City chuan Tottenham Hotspur an hmachhawn dawn a, an inkhel result azir hian Liverpool hi hmahruaitu an ni rei lo viau thei a ni.