Juan Mata chuan Manchester United-ah hun a hmang zo dawn hnai tawh a, heti chung hian Premier League chu nuam a tih thu a sawi chhuak.

Spanish star Juan Mata chu January 2014 atang khan Old Trafford-ah a la awm char char a, khatih laia United manager David Moyes chuan Mata hi £37 million ($47 million) zetin a lei a. Mata hian United tan game 200 chuang a khel tawh a, goal 50 a thun tawh bakah mi thun tur vawi 50 a siamsak tawh bawk.

Kum 30-a upa Mata hian Premier League-ah hun a hmang ve ta nual a, Manchester United leh Chelsea ah te a khelh tawh avangin England rama league sang ber chu a hmelhriat hneh ve tawh hle a ni.

Manchester United in 4-1 a Fulham an hneh hnu khan Mata chuan ama blog-ah, “Fulham nen kan inkhelh zawh khan Premier League-ah goal 50 ka thun tlin tawh thu leh assist 50 ka neih tlin tawh thu min rawn hrilh a. Hetiang ka thleng thei hi a lawmawm ka ti a, thil chhuanawm tak pawh a ni awm e. Mahse, ka la duhtawk mai lo a, a aia tam hi ka la beisei zel duh a ni,” a ti.

“England ramah hian kum eng emaw zat ka lo khel ve tawh a, hun heti chen nuam ti taka English football khel thei tura remchang min siamsaktu Chelsea leh Manchester United hnenah lawmthu ka sawi duh a. Premier League khawvela ka hun tha ka hmang thei hi a hlu ka ti a, lawmawm ka ti tak zet a ni,” a ti bawk.

Season liam ta khan Manchester United chuan Mata contract chu thla 12 chhung an pawt sei leh a, 2018-19 ah chuan contract chungchang hi an la sawi leh miah lo a. Hetiang a nih zel chuan season tawp rualin Spaniard hian free in Old Trafford hi a chhuahsan thei dawn a ni.

Jose Mourinho ruahmannaah Juan Mata hi a la pawimawh phak em avangin club chuan Mata hi contract chungchang sawipui an tum hnai niin thenkhat chuan an sawi a ni.