Premier League Golden Boot ka dawng leh dawn: Kane

08th December 2018, 06:12PM

Tottenham star Harry Kane chuan kumina FIFA World Cup-a a hlawhtlin ang bawk khan Premier League lamah pawh hlawhtlin a tum thu sawiin, Premier League Golden Boot dawn leh ngei a tum thu a sawi.

Harry Kane hian tun season-ah Premier League goal 9 a thun tawh a, tun hnaiah a zawnin game thum chhung chu goal a thun tawh nghe nghe a. Tun dinhmunah chuan Premier League-a goal thun hnem ber ni mek Arsenal striker Pierre-Emerick Aubameyang chiah a pha rih lo a, Aubameyang hian goal 10 a thun tling tawh a, Kane aiin goal 1 chiahin a thun hnem a ni.

Kum 25-a upa Harry Kane hian 2015-16 season leh 2016-17 season-ah te khan Premier League Golden Boot hi a lo dawng tawh a, Russia ramah pawh top scorer a ni zui a. Russia rama a chet that theih avang khan Spurs pawh dinhmun sang takah a dinpui theih a inring hle.

Kane chuan, “Khawvela inelna sang ber World Cup-ah meuh pawh ka chet that theih chuan beiseina ka neih san phah hle a. Kha inelnaa ka chet dan vel ka thlir let hian inrintawkna nasa tak ka neih belh phah a ni,” a ti.

“Theihtawp ka chhuah ang a, rim takin ka inpuahchah zel ang a, Premier League Golden Boot hi ka dawng leh thei ngei ang tih hi ka ring nghet tlat a. A hma zawng aia tam pawh goal hi ka thun thei a ni tih ka hre chiang khawp mai,” a ti bawk.

Copyright © inkhel.com 2024. All rights reserved.