Arsenal in Leicester City an hneh tumin Mesut Ozil chuan Arsenal captain ban hren a hreng a, goal khat thunin Premier League bikah chuan German player zinga goal thun hnem ber a ni ta.

Thawhtan zana Arsenal leh Leicester City inkhelhin Ozil chuan half time hma hretin Arsenal tan mawi em emin goal a thun a. He goal hi Arsenal goal khatna niin, Mesut Ozil tan chuan Premier League bika goal 30 a thunna a ni a. Premier League bikah German player awm tawh zawng zawng zinga goal thun hnem ber a nih theih phah a ni.

German midfielder Mesut Ozil hian Leicester City an hmachhawn hma khan Uwe Rosler leh Jurgen Klinsmann te nen Premier League goal 29 theuh thunin dinhmun sang ber an luah a. Leicester City laka goal khat a thun chiah khan Ozil hi a sang berah a awm thei ta chiah a ni.

1994-1995 season khan Jurgen Klinsmann chuan Tottenham Hotspur tan season khatah goal 21 zet mai a thun a, German player tan season khata goal thun hnem ber record a siam a. Spurs ho chanchinah pawh season khat chhunga hetiang zat goal thun theih chu sawi rik reng a la ni bawk a. Bayern Munich leh Sampdoria vela a kual hnuah 1997-98 khan Premier League lamah a kir leh a, goal a thun belh leh a ni.

Uwe Rosler chuan 1993 leh 1996 inkar khan Manchester City tan goal 29 a thun a, 1994-95 kha a chet that ber niin hemi season hian goal 15 a thun tling a. Mahse, hemi season hnu chiah hian Manchester City chu Premier League atangin an relegate zui a. 2000 khan Premier League khawvelah Rosler hi a inlar leh a, Southampton tan a khel tawh a, mahse game 24 khelhah goal a thun ta lo.

Premier League bika German player goal thun hnem zualte chu Mesut Ozil, Jurgen Klinsmann leh Uwe Rosler te bakah Robert Huth (19), Lukas Podolski (19) leh Michael Ballack (17) te an ni.

A pumpuiah Premier League bikah German player hrang hrang 32 te chuan goal an thun tawh a ni.