Sunday zan Premier League inkhelah Tottenham leh Liverpool te chuan Tottenham Hotspur Stadium-ah inkhel hmuhnawm tak min hlui a, Premier League game dik tak khelin team hnihte hi 2-2 in an inhnehtawk.

Tottenham tan hian Harry Kane leh Heung-min Son te chuan goal an khung a, Liverpool tan hian Diogo Jota leh Andy Robertson te chuan goal khungin, Spurs leh Liverpool te hian point khat ve ve an hlawhchhuak.

Khelh 18-ah Liverpool hian point 41 neiin pahnihnaah an awm chhunzawm zel a, point thumin hmahruaitu Manchester City an pha lo. Tottenham hi Antonio Conte an rawih hnuah Premier League inkhela tlawm an la nei lo zel a, khelh 15-ah point 26 hlawhchhuak tawhin pasarihnaah an awm ve mek thung a ni.

Tottenham 2-2 Liverpool

(Kane 13’, Son 74’) (Jota 35’, Robertson 69’)

Player Ratings

Mual neitu lam Tottenham hian minute sawm chuang hret an khelhin hma an hruai nghal a, Ndombele chuan Liverpool defence karah Kane chu through ball tha zet a pe a, Kane hian box chhung dinglam atangin far post lamah a pet lut a, Kane hian kumin May thla hnuah a vawi khat nan Premier League inkhel-ah home-ah goal a khung.

Tottenham hian si hnih faia hmahruaina hun tha tak an nei a, mahse Kane-a ball pek chu Heung-min Son chuan goal-ah a lo chantir thei lova, chance tha tak niin a goal teuh hle bawk. 20mins-ah chiah Kane chuan chiang takin Andy Robertson a tlawh thlu a, Kane hian yellow card hmu in, red card pek a ni lo chu England captain hi a vannei a tih theih awm e.

23mins-ah Ndombele chu midfield-ah ball chhuhsak a ni a, Liverpool hian Spurs nawr nghalin, Sadio Mane chuan box chhung atangin shoot mahse block sak a ni a, Naby Keita chuan box pawnah ball lo changin a shoot ve leh, Hugo Lloris-a’n a lo save.

Darkar chanve an khelh hma deuhin Tottenham hian an goal hnihna tur khungna hun tha tak neiin, Heung-min Son chuan box hmawrah ball a chawk a, Dele Alli pein, Alli hian goal-ah shoot mahse Liverpool goalkeeper Alisson chuan a kut hmawrin a lo save.

Liverpool-in a hnu lawkah goal an khung a, Mane-a ball cross chu Ben Davies chuan an box-ah lo dang mahse Davies hian ball a clear zui thei lova, Andy Robertson rawn pit zukin, Robertson hian box chhung veilam atangin goal hmazawnah ball a cross a, Jota chuan goal-ah lo tauh lutin Liverpool si phurh a rul.

Jota chu box chhungah tihtluk niin, Liverpool hian penalty hlawhchhuah inbeisei hle mahse referee-in a pe lova, VAR lama endik a nih hnuah pawh pek a ni lo. Lehlamah Spurs-in chance an nei ve leh nghal a, Alisson chu box pawnah rawn chhuakin a ball clear tumna lamah a talbuai deuh a, mahse Spurs-in an chance neih an hmang tangkai lo.

Inkhel a hmuhnawm hle a, boruak pawh a tang a, 40mins an khelh tlin hma hretin Liverpool manager Jurgen Klopp chu referee thutluknaa a lungawi loh deuh avangin yellow card pek a ni. Half time hma deuhin Liverpool-in chance an nei leh a, Mane chuan veilam atangin ball a cross, far post lamah Trent Alexander-Arnold chu free taka lo awmin, goal-ah ball a shoot nghal a, mahse Lloris chuan a ke in a lo save.

Second half pawh a hmuhnawm chhunzawm leh nghal a, lehlam lehlama chance kan hmu leh. Second half-ah minute sawm vel an khelhin Kane chuan chance tha lutuk hnai te atangin nei mahse Alli-a pass chu Kane hian goal-ah a khung thei lova, Alisson-a’n a lo save sak. Hemi hnu lawk hian Kane bawk hian corner atanga ball lo kal chu goal-a lo tauh luh a tum leh a, mahse duh angin ball a control thei lova, goal a tauh khum chiah chiah.

70mins hma hretin Alli chu Liverpool box-ah tlu in Spurs-in penalty hlawhchhuah an inbeisei thlawn a, Liverpool-in an nawr let nghal. Salah chance neih chu Lloris-a’n beng chhuak mahse box chhungah Alexander-Arnold a rawn a lut a, far post lamah pe pheiin, Robertson chuan a lo tauh lut a, Liverpool-in 2-1 in hma an hruai.

Minute li hnuah Tottenham-in an si phurh an sut ve leh nghal a, mual veilam atangin Son chu through ball pek niin, Alisson a rawn chhuak a mahse ball a clear sual, box chhungah Son hian ball chang chhunzawmin goal-ah a pet lut a, 2-2 a ni.

2-2 a nih hnu lawkah Robertson chuan tul lo zetin Tottenham fullback Emerson Royal a pet thlu a, referee chuan Robertson hi yellow card pe zet mahse side monitor-a uluk zawka a endik hnuah referee hian Robertson hi direct red card pe in a hnawtchhuak leh ta zawk a ni.

Player sawma an khelh hnuah Liverpool an inthlah dul a, inkhel pawh tempo sang tak a ni lo chho. Liverpool hian tlem zawka khel an nih tawh avangin 2-2 a inhnehtawk pawi an ti lova, hun pawh an khawhral lui a, tlar hnunga an tam deuh tawh avangin Spurs pawhin an nawr lutuk thei tawh lo. Injury time minute ruk pek belh ni mahse Spurs hian goal an khung belh thei lova, 2-2 hian inkhel a tawp ta a ni.