Arsenal chu Premier League club 20 zinga discipline chhe ber niin, tun season chhungin yellow card 73 zet an hmu tawh a, red card pawh 5 an hmu tawh.

Mikel Arteta pawlte chuan tun season chhunga game 34 an khelh tawhah card an hmu hnem ta hle a. Vawi 73 ngawt mai yellow card an hmuh bakah, an player 5 an hnawhchhuah tawh avang hian hetiang lama tehfungah point 346 zet an hmu tawh a, an sang fal hle.

Leicester City leh Arsenal inhnehtawk tum khan Eddie Nketiah chu substitute bench atangin an luhtir a, khelmuala a luh atanga minute 4 vel lekah red card a hmu zui nghal a, Arsenal player zinga hnawhchhuah tharlam ber a ni.

Premier League champion ni tawh Liverpool chu Fair Play table-ah pawh a chungnung ber an ni a, yellow card 31 an hmu tawh a, red card chu 1 chiah an la hmu a, an point hi 134 a ni.

Leicester City chu pahnihnaah an awm a, Southampton chu pathumna an ni bawk a. Chelsea, Crystal Palace leh Brighton te chu an hnuaiah hian an awm ve bawk a ni.

Fair Play table-ah hian club hrang hrangin yellow card an hmuh chuan point 4 zel an hmu a, yellow card vawi hnih hmuh vanga hnawhchhuah an awm chuan point 10 an hmu a, red card hmanga hnawhchhuahte chuan point 12 an hmu bawk a ni.