Vawiin Ningani khan Premier League club 20 te chu 2020-21 season atan an meeting hmasa ber an nei a, hetah hian substitution panga siam theih chu an duh tawh lo tlang.

Premier League season khelh zawh takah khan lockdown hnuah game khatah substitution panga siam theih a ni a, FIFA chuan he dan hi season tharah duh chuan hman chhunzawm theih turin chhawpchhuak mahse Premier League lamah erawh an hmang tawh dawn lo.

Substitution panga siam theih a nih hian bench lama player awm thei pawh pasarih atanga pakuaa tihpun a ni a, season tharah substitution panga siam theih a nih tawh dawn loh avangin bench lamah pawh a dan pangngaiin player pasarih an awm leh tawh ang.

Vawiin khan sawi tawh angin Premier League team zawng zawng, Championship lam atanga rawn kaithar pathum Leeds United, West Brom leh Fulham –te chuan meeting pawimawh tak an nei a, hetah hian season thara VAR hman chhunzawm zel pawh an duh tlang.

VAR hi a hma chuan International Football Association Board (IFAB) kutah awm mahse, tunah erawh FIFA kutah a awm tawha, season tharah chuan referee te’n khelmual sira monitor-ah a tul an tih chin chu an endik thei tawh dawn bawk.

Penalty pet a nihin, goalkeeper an line atanga chhuak te chu uluk leh zuala en a ni tawh dawna, goalkeeper te hi an line atanga an chhuaha, ball an khawih buaia a goal loh phah a nih chuan penalty hi pet that tur a ni dawna, mahse ball an khawih buai lo a nih chuan pet that kher tur a ni dawn lo a ni.