Premier League club liante chuan Chelsea player Eden Hazard-a nau Thorgan Hazard chu an hmu tai hle niin chanchinbu mite chuan an ziaka, Thorgan hi season tharah Premier League-ah kan hmu leh lovang tih a sawi theih loh.

Thorgan hi tunah hian Bundesliga lamah a khel mek a, Borussia Monchengaldbach ‘star’ player a ni. Thorgan hian Borussia Dortmund zawm a tum niin thuthang lian tham tak a awm a, Dortmund leh Monchengladbach-te inkarah hian indawrna pawh a kal mek niin a lang.

Thorgan duhtu te zingah hian Arsenal leh Liverpool an langsar hle a, anni bakah hian Chelsea pawhin an player hlui hi an ngaihven ru ve reng niin thawm a awm bawk. Thorgan-a man hi pound maktaduai 35 man bawr vel ni tura ngaih a ni a, a that ngaihtuahin tunlai angah a man hi a to lo hle a tih theih awm e.

Thorgan hi Chelsea player hlui a ni a, London club hian kum 2012 khan Lens atangin an lalut. Chelsea-ah hian hmun lailum chang hleithei lovin loan-a a chhuah hnuah Monchengladbach chu a kum 2014 khan a zawm a, Bundesliga-ah a langsar pawl a ni zui.

Chelsea hian Thorgan an hralh hian lei let leh theihna (buy-back clause) an nei a, Monchengladbach nen an inremna chiah hriat a ni lo. Buy-back clause an neih avang hian Chelsea hian Thorgan hi an duh tak taka a an dawr a nih chuan lalut thei tur hmasa ber an ni. 

Thorgan-a u Eden Hazard chu Chelsea atanga chhuak tur angin sawi a ni nasa hle tawh a, nipui bazar hunah Real Madrid a pan ngei a rinawm. Chutih laiin a nau Premier League lamah a lo kal leh maithei a, season tharah Premier League-in Hazard chan mahse Hazard dang a rawn lut leh thut thei a ni.