09 Aug 2019 05:10

inkhel

Premier League club te sum che vel

England ramah transfer window an khar fel ta a, Premier League club hrang hrangte chuan player leina atan pawisa an hmang hnem hle a, record thar an siam hial a ni.

Transfer window a inkhar chiah khan Premier League club 20 te sum hman zawng zawng belh khawm chu £1.438 billion zet a tling a. A hmaa pawisa hman hnem ber record awm mek chu a khum a ni.

Arsenal chu tun tuma pawisa tiche nasa ber an ni a, £155 million bawr vel chu an chet velnaah a che a. Chelsea chu Premier League club zinga hlawk ber an tih theih a, player hralh chhuahna atangin £80.6 million vel chu an la lut a, an hmelma lian, London club Arsenal hnenah transfer window inkhar hma hretin David Luiz chu an hralh chhuak a ni.

A hmaa Premier League club 20 te’n player lei tharna atana sum an hman hnem ber tum chu 2017 kha niin, khami tuma an sum hman belhkhawm chu £1.425 billion a ni a, kumina an sum hman zawng zawng chu £1.438 billion niin, record awm sa hi a khum ta a ni.

Player lei tharna atan hian Premier League club te chuan sum hmang hnem viau mahse kumin atangin England ramah TV rights chu a tlahniam dawn a. Europe khawmualpuia league lian hoah chuan England chiah hi hetianga TV rights tlakhniamna a ni a, heti a nih chuan club eng emaw zat chuan 2019-20 season chhung hian an beisei angin sum an lak luh loh hmel hle.

Kumin nipui chhunga transfer window khar ni ringawta sum hman zat chu £170 million a tling a, hetiang zat hmanna hi player 18 chauh an ni thung a. 2009 hnua transfer window khar nia player lak luh tlem ber tum a la ni.

A tawp nia Premier League huang chhunga player inleina to ber chu Everton in Arsenal atanga £34 million senga Alex Iwobi an la lut kha a ni a. Transfer window tawp nia tihfel zinga sum che lian ber chu Manchester United-in Romelu Lukaku an hralh kha niin, Lukaku khan £74 million in Inter Milan a pan a, United-in Everton atanga an lei chhuahna aiin £1 million in a tlem zawk a ni.

Tun tumah khan Premier League club 20 zinga 11 te chuan an club transfer record thar an siam a, Sheffield United chuan an record neih sa let li vel zet pawisa an hmang a. Arsenal, Aston Villa, Leicester (record let hnih), Manchester City, Newcastle United, Southampton, Tottenham Hotspur, Watford, West Ham leh Wolverhampton te chu record khumtute an ni.

Manchester United chuan Leicester City atangin Harry Maguire chu £80 million in an lei a, hei hi tun tum transfer window inhawn laia Premier League club-in player an leina to ber a ni a. Arsenal-in £72 million senga Lille winger Nicolas Pepe an la lut kha a sang ber dawttu a ni.

Manchester City chuan Atletico Madrid midfielder Rodri chu £62.8 million in an lei a, Juventus right-back Joao Cancelo pawh £60 million in an lei bawk a. Tottenham Hotspur chuan Lyon midfielder Tanguy Ndombele chu £53.8 million in an lei a, January 2018 hnua player an lei leh hmasak ber a ni.

Right-back Aaron Wan-Bissaka chu Manchester United chuan Crystal Palace atangin £50 million in an lei a, West Ham chuan Eintracht Frankfurt striker Sebastien Haller chu £45 million in an lei bawk a. Newcastle United chuan Hoffenheim atangin striker Joelinton chu £40 million in an lei a, Leicester City pawhin Monaco atangin midfielder Youri Tielemans chu £40 million in an lei bawk a ni.

Chelsea chuan Real Madrid midfielder Mateo Kovacic chu £40 million in an lei a, Real hnenah hian Eden Hazard chu £150 million zetin an hralh thung a. Kovacic hi loan-a an hawh lai niin, player lei phalsak ni lo mahse Kovacic hi an lo register sa tawh avangin Frank Lampard chu Croat midfielder hi a ngheta lak an phalsak ta a ni.

Aston VIlla chuan £125 million zet an seng a, Premier League lama kai thar club zingah chuan £100 million chuang hmang tling hmasa ber dawttu niin, season hmasaah Fulham chuan an lo hmang tling tawh a. Sum hmang hnem viau mahse April thlaah khan Fulham chu Championship division lamah an tla leh ta daih a ni.

Premier League club te hian a hmaa an sum hman belhkhawm record chu khum mahse transfer window la inhawng mek, La Liga club te chuan an la lehpel thei a. Tun thlengin a Liga club te chuan £1.1 billion an hmang tling tawh a, Real Marid, Atletico Madrid leh FC Barcelona te chuan an sum hman belhkhawm hmun thuma thena hmun hnih hi an hmang a. September 2 thleng hian transfer window a la inhawng dawn a, club te hian pawisa hi an la hman belh nual a rinawm a ni.