Liverpool chu Premier League club zinga ngei hlawh ber niin tun hnaia an zir chiannaah an sawi a. Premier League club 20 zingah Liverpool aia ngei hlawh hi an awm lo niin an sawi.

Website FanChants chuan tun hnaiah khan inkhel entute au hla chi hrang hrang an zir chiang a, hetiang au hla 26,000 chuang zet awm zingah Jurgen Klopp leh a pawlte chungchang au hla hi a tam ber a nih thu an sawi a ni.

Au hla chi hrang hrang zingah Liverpool auh elna hla 50 zet a awm niin Website FanChants chuan an sawi a, hei vang hian a chungnung berah an puang a. Anmahni hnaih bertu chu Tottenham Hotspur niin, Spurs auh elna hla hi 42 chu a awm bawk a ni.

Premier League champion Manchester City chu pathumna an ni a, tih elna hla 39 ngawt mai an nei ve a, an thenawm club Manchester United chu palina niin, an club tih elna hla 34 chu a awm bawk a ni.

Divsion hniam lam club te pawh an bih chiang vek a, heng zingah hian Leeds United chu an chungnung ber a. Kar hmasaa Championship play-off semi final-a Derby laka tlawm Elland Road club te auh elna hla hi 117 zet mai a awm a ni.

Tun season-a Premier League title la thei dinhmuna ding chho reng, game hnuhnung ber thlenga beiseina nei sang tak Liverpool chuan kum 29 chhung an lo nghahfak tawh league an la teuh hle a. Hetiang dinhmuna an din vang hian club lian dang - Manchester United, Arsenal leh Chelsea tantute chuan an ngaithei lo hle niin a ngaih theih a. Hei vang tak hian auh elna pawh season dang zawng aiin a nasa niin a ngaih theih a ni.

1980 chho velah kha chuan Liverpool hi English football khawvelah chuan a langsar ber pawl an ni ngar ngar a, 1990 a rawn inher chhuak a, Manchester United thawm a rawn lian ve leh thung a. Anni mai bakah Arsenal leh Chelsea te chu thawm nei lian pawl an ni tel bawk a, tunah chuan Manchester City boruak a alh leh mek a ni.