Manchester United chuan transfer deadline day-ah khan £36million laiin laiin Monaco atangin Anthony Martial an lei, khami tum khan Martial hi Premier League club dangte pawhin an lo be chiang a, club pakhat phei chuan United ngamna zat aia sangin lei an tum. Mahse Martial chuan United zawm a duh avangin chu chu a hnawl ta a ni.
Transfer deadline boruak chungchang kha Monaco vice-president Vadim Vasilyev chuan sawi chhuak lehin, kum 19 mi French striker kha English club dangin an dawr, club pakhat phei chuan United aia toa leia , Monaco-a kum khat dang cham leh turin an la ti bawk a ni awm e.
Vadim Vasilyev chuan,"Premier League club zingah Man Utd aia ngam sang an awm alawm. A man zat erawh ka sawi lovang, United aiin inremna pawh tha zawk an duh a, Monaco-ah kum khat dang cham pawh an phal hial.
"Mahse amah berin Man Utd pan kha a duhthusam a ni a, €30m leh bonus telin kan chhuah ta a ni," tiin a sawi.
Kar hmasa khan Arsenal manager Arsene Wenger chuan Monaco demna thu a chhakchhuak a nih kha. Arsenal khan an dawr ve ngei tih a chiang a, Wenger chuan Martial hralh an phal loh thu leh engzat man pawha hralh an tum loh thu an hrilh laia a hnua an hralh chhuah leh tak tho avangin a lungni vak lo. Vadim Vasilyev-a sawi kha Arsenal kha an ni thei angem ? Nge Chelsea zawk ?
Chelsea pawh khan kum 19 mi Martial hi an lo rim ve ngei bawk tih media ten an tarlang bawk a. Sapram media te chuan Martial khan Chelsea a hnawl ngei niin an tarlang. Martial hian United tan game 6-ah goal 4 a khung der tawh a ni.
picture credit : Getty