Roy Keane chu Premier League huang chhunga captain ni tawh zawng zawnga ropui berah an thlang.

Tun hnai khan SunSport chuan mipui ngaihdan an la a, Premier League club hrang hranga captain lo ni tawh zinga ropui an tih ber an thlantir a. Mi thahnem takin an ngaihdan hi an thawh a, hetah hian Manchester United captain hlui Roy Keane chuan vote a hmu sang ber a ni.

England rama chanchinbu lar The Sun chhunga infiamna lampang buaipuitute chuan ngaihdan hi an la khawm a. Manchester City captain kal chhuak tur Vincent Kompany chhuah dawn denchhena hetiang hi buatsaih an ni a, Keane aia sang hi an awm lo a ni.

Mipui lampang chuan Arsenal captain Tony Adams te, United captain Rio Ferdinand te, Liverpool captain Steven Gerrard te, Roy Keane, Vincent Kompany te bakah Leicester City captain Wes Morgan, Chelsea captain John Terry leh Arsenal captain Patrick Vieira te chu an thlang hlawm a ni.

Vote hi a tla tha thawkhat viau a, heng zawng zawng atang hian Roy Keane chuan 36% a hmu a, a sang fal hle a. Amah hnaih bertu John Terry chuan 19% hmuin pahnihnaah a awm a, pathumnaah chuan 15% hmutu Vincent Kompany a awm a, a hnuaiah hian 9% hmutu Steven Gerrard, Patrick Vieira leh Tony Adams te an awm bawk.

Vote hmu sang zual zingah hian Rio Ferdinand leh Wes Morgan te chu an hniam bik hle a, Ferdinand hian 2% a hmu a, Morgan chuan 1% chauh a hmu ve a ni.

Roy Keane chu 1990 leh 2000 chho vela Manchester United vul zual laia an team chakna thahrui pawimawh tak a ni a. United chu 1999 khan treble champion a nihpui a, Premier League title, FA Cup leh UEFA Champions League title te a lakpui thei a ni.