04 Jul 2019 09:06

inkhel

Premier League ball - Nike Merlin

Nike chuan tun thla tir lamah khan 2019-20 season chhunga Premier League official ball tur an tlangzarh a, American company lian ball siam thar ber hi Nike Merlin a ni.

Premier League leh Nike te hi kuminah kum 20 an inkawp tling ve der tawh a, kum 20 an inkawp champha denchhen hian Nike Merlin hi an siam a. He ball hi Premier League-a hman atan liau liaua an siam a ni.

Nike leh Premier League te hi 2025 thleng an la thawkho reng dawn a. Premier League leh Serie A te chuan Nike hi an la zawmpui zel a, La Liga erawh chuan season thar atangin Puma ball an hmang ve thung ang.

Nike Merlin hi Nike chuan ball an siam chhuah tawh zawng zawnga an chhuan ber a la nih thu an sawi a, 2018-19 season-a an ball siam, Nike Merlin tho zul deuha an siam niin, a that tawk lohna lai nia an hriat chu an thlak danglam tawh hlawm a. Hei bakah hian thil thar pawh an belh nual bawk.

Nikum lama an ball siam ang deuhin siam mahse tun tuma mi hi chu a hmel lan dan pawh a danglam angreng a, a rawng an thlan te, a rawng intial dan te chu a dangdai hle.

2017-18 season hma kha chuan Nike chuan ball an design reng rengin panel 32 an siam thin a, nikum season tan dawnah khan panel 4 chauhin an siam tan a, khawvelah chuan a hmasa ber a ni. Panel an tih tlem hian boruaka ball kal dan vel pawh a dik lehzual tura naih niin, player te pawhin ball an petin an duh ang taka an pet theih phah an ring a ni.

Kieran Ronan, Nike GM of Global Equipment chuan, “Premier League mil thei ber tur ball siam hi kan tum ber a ni a, ngun takin kan ngaihtuah a, kil hrang hrang atanga kan thlir hnuah he ball hi kan siam chhuak ta a ni,” a ti.

A sawi zelnaah, “Ball pet nuam em em mai, kal dik bawk si, English mite inkhelh dan te, an nunphung thlenga mil thei tur a ni a, Premier League bika hman atan liau liaua duan a ni bawk a, tha viau tura ngaih a ni,” a ti bawk.

Season hman zawh takah khan Premier League team hrang hrang 20 te chuan Nike Merlin kha vawi 1,072 zet an pet goal a. 2019-20 season-ah chuan ball thar pet nuam zawk leh kal dik zawk an hman dawn avangin a hma aiin goal pawh a luh hnem zawk an rin thu an sawi.

Ball thar hi Nike hian an duang uluk hle a, panel 4 a nih bakah Nike Aerowtrack groove chu ball thlawk vel kal dik theihna bulpui a ni dawn a. Nike ho All Condition Control (ACC) thar ber Urban Grip vangin ball chu sik leh sa chi hrang hrang mil zual tura ngaih a ni.