Premier League-ah Neymar?

06th December 2018, 10:12PM

Neymar chuan footballer tha tak takte chuan eng tikah emaw tak Premier League an pan ngei tur a ni tih thu sawiin, amah pawh hian eng tikah emaw chuan England lam a la pan theih thu a sawi.

Paris Saint-Germain star Neymar chu hun eng emaw atang khan Premier League nen an lo sawi zawm tawh thin a, amah beiseitu nia an sawi lar berte chu Manchester City leh Manchester United te an ni.

€222 million zeta La Liga champion Barcelona atanga Ligue 1 champion PSG a zawm khan Brazilian forward hian kum nga chhung atan contract a ziak a. Heti chung hian kum 26-a upa Neymar chuan Paris khawpuiah a awm reng kher lo maithei niin a sawi.

“Premier League hi a ropui a, a boruak pawh a sang a, khawvela league hrang hrang zingah chuan a ropui ber pawl a ni,” tiin Neymar chuan a sawi.

Manchester City full-back Benjamin Mendy chuan Neymar hi kawmin, Premier League lama kal a tum leh tum loh a zawt a, he an inbiakna video hi YouTube-ah an dah a ni.

Neymar chuan, “Eng thil nge naktukah thleng dawn kan hre lo a, eng pawh thleng thei vek a ni a. Mahse, ka ngaihdanah chuan player ropui tak takte chuan eng tikah emaw ber pawh Premier League hi an pan tur a ni,” a ti.

Tun season chhungin Neymar hian PSG tan game Ligue 1 goal 11 a thun tawh a, inelna hrang hranga a goal thun zawng zawng hi 15 a tling tawh a ni.

Copyright © inkhel.com 2024. All rights reserved.