Crystal Palace chuan Selhurst Park ah Manchester City an mikhual a, he inkhelah hian City chu 3-1 in an chak a, Premier League hmahruaitu an nih leh theih phah a ni.
Roy Hodgson chuan Newcastle an hneh tuma a khelhtir pahnih chu a thlak danglam a, James Tomkins chu a inhliam avangin tun season chhung chuan a chhawr theih tawh dawn lo a, hei vang hian Scott Dann chu tar hnungah a aiah a lut a. Tlar hmaah pakhat a thlak danglam a, Michy Batshuayi chu substitute bench lamah a thuttir a, a aiah hian Christian Benteke chuan bul a tan a, Benteke hian February hnua bul a tan leh hmasak ber niin, tun season chhungin vawi 7 bul a tanna a ni.
Pep Guardiola chuan Nilai zana UEFA Champions League an khelha Tottenham Hotspur an hneh loh tuma a khelhtir chu pali a thlak danglam ve bawk a. Inhliam vangin Fernandinho chu a tel thei lo a, Kevin De Bruyne chuan bul a tan thung a. Nicolas Otamendi pawh a chawlhtir a, a aiah hian Vincent Kompany a lut a. November thla atanga a vawi khatna atan Benjamin Mendy chuan bul a tan ve leh a, Leroy Sane pawh a lut nghal a, Sergio Aguero chu tlar hma berah a ding a ni.
Crystal Palace (4-3-3): Vicente Guaita; Aaron Wan-Bissaka, Scott Dann, Martin Kelly, Patrick van Aanholt; James McArthur, Luka Milivojevic, Jeffrey Schlupp; Andros Townsend, Wilfried Zaha, Christian Benteke
Subs: Max Meyer, Cheikhou Kouyate, Joel Ward, Wayne Hennessey, Bakary Sako, Michy Batshuayi, Jordan Ayew
Manchester City (4-3-3): Ederson; Kyle Walker, Vincent Kompany, Aymeric Laporte, Benjamin Mendy; Kevin De Bruyne, Ilkay Gundogan, David Silva; Raheem Sterling, Leroy Sane, Sergio Aguero
Subs: Gabriel Jesus, Arjanet Muric, Bernardo Silva, Danilo, Nicolas Otamendi, Riyad Mahrez, John Stones
Inkhel tan atangin rin kai zawk Manchester City chu an chungnung nghal a, a tir atangin a nawrtu zawk an ni nghal a, goal thun vat an tum hle a. Hetih lai hian mual neitute pawhin City laka point 3 hlawh chhuah theih ngei an tum a, goal thun hmasatu nih an tum dun hle.
Mikhual team chuan goal thun theihna hun tha an siam chho nghal nual a, an tum erawh an puitlin nghal mai bik lo a. Minute 15-ah goal a lut a, Kevin De Bruyne chuan Palace defender te chu a tibuai a, Raheem Sterling chu ball tha zet mai a pe a, hei hi Sterling chuan lain Palace goal-ah chuan a thun a, City chu 1-0 in hma a hruaipui a ni.
De Bruyne hian May 13, 2018 hnuah Premier League bikah mi goal thun tur a siam leh ta miah lo a, season liam taa an game hnuhnung bera Southampton nen an inkhelh tuma assist a neih chu a chhunzawm leh chiah a ni.
Manchester City in Premier League game an khelh hnuhnun 26-a Sterling-a’n goal a thunnaah chuan an la chak zel a, tun tumah pawh Sterling chu goal thuntu a ni bawk a, chak leh ngei an inbeisei hle a. He goal hi tun season chhunga 16 a thunna chiah a ni.
Half time thlengin goal dang a awm belh tawh lo a, chawlhlawkah hian mikhual team zawk Manchester City chuan 1-0 in hma an la hruai a. Crystal Palace chu tun season chhunga an khelmuala an inkhelhin 41% chiah an la chak thei a, Premier League-ah chuan mahni khelmuala chak tlem ber an ni.
Second half an khel leh a, a hma ang bawkin City chu an chungnung leh nghal a. Ball pawh an chang hnem hle a, mahse goal thun theihna hun remchang erawh an duh angin an hmu thei mai bik lo.
City hi Premier League game an khelh hnuhnun 8 ah an chak thei a, heng zinga game 7 ah hian vawi 6 chu an goal an venghim nghe nghe a ni.
Inkhel boruak a dul chho angreng viau a, mahse minute 63-ah goal a lut leh a, boruak a danglam leh phah hle.
David Silva chuan Leroy Sane chu ball a pe a, Sane hian ball chu Palace goal lamah a vawrh phei a, hei hi Sterling chuan goal-ah chuan a lo thun a, City chuan 2-0 in hma an hruai theih phah a. Sane hian tun season chhungin Premier League-ah mi goal thun tur vawi 25 a siam ta a, hetiang zat assist nei thei awm chhun hi a ni.
An lama goal hnih a luh meuh chuan Crystal Palace chuan goal thun tumin beihpui an thlak ve a, mahse City defender te chu an duh angin an pal tlang thei chuang lo a. City hian Premier League game an khelh hnuhnun minute 788 chhung chu goal an chhuah tawh lo a ni.
Minute 81-ah Gundogan chuan McArthur chu penalty area pawn chiahah a titlu a, Palace chuan free kick an hlawh a. Luka Milivojevic chuan free kick hi a pet a, tha zetin City goal-ah chuan a pet lut a, an si phurh pakhat chu a sut theih phah a. Premier League-a Milivojevic goal 24 thun tawh zinga goal 2 tih loh chu set piece atanga a thun vek an ni.
Goal an thun takah chuan Crystal Palace boruak a inthlak chiang hle a. May 2014 khan Selhurst Park-ah hian Liverpool an lo mikhual a, hemi tum hian minute 79-ah mikhual team chuan 3-0 in hma an hruai a, mak tak maiin hun tawpah 3-3 in an inhnehtawk leh a. Hetiang deuh hi thlentir theih tumin beihpui an thlak thar leh a ni.
Hun tawp dawnah goal a lut leh a, mahse inhnehtawkna goal ni loin point 3 tichiangtu zawk a ni tlat mai a. Minute 90-ah Kevin De Bruyne chuan Gabriel Jesus chu ball a pe a, Jesus hian ball chu lain Palace goal-ah chuan a va thun a, offside ang viau mahse linesman chuan a phar lo a, City chuan 3-1 in hma an hruai theih phah a ni.
Hemi hnu hian goal dang a awm tawh lo a, hun tawpah Manchester City chu 3-1 in an chak a, Liverpool lehpelin Premier League hmahruaitu an ni leh ta chiah a. Game 33 khelhah Manchester City hian point 83 an hmu a, Liverpool aiin point 1 in an sang chiah a ni.