Chelsea captain chhuak tur Gary Cahill chu thla thar atangin Chelsea chuan an chhuah zalen tawh dawn a, free agent a ni dawn.

Cahill hi a pan tur lam a la hriat lova, Premier League-ah a la awm maithei tih thu a sawi rualin, engmah chiang a la awm bik loh thu a sawi. Cahill chuan, “Chawlh hmanga kar eng emaw zat kal ka duh phawta, chumi zawh chuan ka lo kir anga, ka tana duhthlan tur awmte ka bih chiang ang.

“Premier League atan ka la tha tawkin ka hria a, he league-ah hian ka la awm chhunzawm maithei. Mahse ka hmanhmawh lova, nipui chawlh laiin thutlukna ka siam fel ang. Inngaihtuahna hun ka ngaha, thutlukna dik tak pawh ka siam ngei a rinawm. Season tharah inkhel turin ka lokir dawn a, chu chu ka thil chak pakhat a ni,” a ti.

Cahill hian Stamford Bridge-ah tun thla chhung bak contract a nei tawh lova, kumin kum tir khan Juventus, Monaco leh Fulham-te atanga sawmna a dawn chu a lo hnawl tawh niin Sky Sports chuan a tarlang.

Kum 33 mi hi Chelsea manager Maurizio Sarri-a hnuaiah a khel tam lo hle a, tun season tluan khan Premier League game hnih chiah a khel.

Cahill chuan a chhuahsan tur Chelsea chungchang sawi zuiin, “Chelsea hi Champions League khel tura kan inpet tlin avangin ka lawm a, tun season-a kan hmachhawp pakhat a ni. Chumai bakah season tluana kan khelh chhan trophy la in season kan khar bawk.

“Chelsea hi an bazar thei dawn lova, eng nge an an zel dawn tih chu kan hmu dawn chauh, mahse player naupang tha tak tak an neih avangin a phurawm hle in ka hria. Player naupang zawkte leh tuna an kawl sa te hi supporter lam pawhin an lawm ngei ka ringa, an squad neih en hian hmalam panin chak takin an kal thei tih ka hria a ni,” a ti bawk.