Kum 28 mi Coutinho chuan a agent hnenah Champions League-a Bayern Munich an la dam chhung chu khaw dang la hawi lo turin a hrilh niin Express-in a tarlang a nih kha.

Hetih mek lai hian Arsenal chuan Coutinho hi an ngaihven ve mek bawk a, lak theihna hun remchang an nei thei maithei niin a lang tlat mai. Tunah hian Bayern Munich lamah loan-in a khel mek a, Countinho hian Barcelona hi a chhuahsan a rinawm hle niin English media te chuan an tarlang.

Arsenal hian Coutinho leh Matteo Guendouzi te chu inthleng an phal dawn niin Foot Mercato chuan a tarlang. Barcelona-a insiamrem hleitheilo Coutinho hi loan-a a khelh mekna Bayern Munich atangin Camp Nou lama a let leh a rinawm tawh loh hle niin media te chuan an tarlang bawk.

Brazilian attacking midfielder Coutinho hian 2013-2018 chhung ropui takin Anfield-ah hun a hmang, Liverpool tan game 152 khelin goal 41 a khung tling bawk. A that vanglai takin kum 2018 khan Barcelona a pan.

Barcelona tan game 52 khel hmanin goal 13 a khung a, 2019-20 season khan Bayern Munich-ah loan-in a chhuak ta a. Bayern Munich tan game 23 khel tawhin goal 8 a khung tawh a ni.

Transfer bazar a hot chho leh dawn niin a lang, club leh player an inremtawh ni tein thuthang a la rawn awm nawk zel dawn. Inkhel member-te chiai lo ila, transfer titi kan rawn tarlang chho zel anga, confirm leh confirm lo chu chiang takin kan tarlang chhunzawm zel dawn a ni.