Play-off final-ah Aston Villa chuan 2-1 in Derby County an hneh a, kum thum zet an awm tawh lohna Premier League-ah an kir ve leh dawn ta.
Inkhelh hmuhnawm leh boruak sang tak maiah Anwar El Ghazi chuan Aston Villa chu hma a hruaipui a, hei hi John McGinn chuan a rawn thun belh ve leh bawk a. Derby goal neih chhun chu Jack Marriott chuan a thun ve a ni.
Tun hnaiah Aston Villa hi an che tha chho hle a, an game hnuhnung 12 ah vawi hnih chiah an tlawm a, tun season bikah Derby nen hian vawi hnih an inkhel tawh a, heng game hnihah hian Aston Villa chu an chak ve ve a, goal 7 an thun laiin Derby hian goal an thun ve lo thung.
Nikumah khan Aston Villa hian play-off final hi an khel tawh bawk a, a tlawm zawkah an lo tang tawh a. Anni hi 2004 leh 2005 a West Ham United hnua kum zawna play-off final khel leh thei hmasa ber an ni.
Dean Smith-a pawlte Aston Villa hi semi final-ah West Bromwich Albion nen 2-2 a an inhnehtawk hnuin, penalty hmangin an hneh a, final hi an thleng thei a. Frank Lampard-a pawlte Derby chuan Leeds United chu aggregate-in 4-3 in an hneh a, final hi an lut ve bawk a ni.
Derby (4-2-3-1): Kelle Roos; Jayden Bogle, Richard Keogh, Fikayo Tomori, Ashley Cole; Tom Huddlestone, Bradley Johnson; Harry Wilson, Mason Mount, Tom Lawrence; Mason Bennett
Subs: Scott Carson, Calum MacDonald, George Evans, Jason Knight, Florian Jozefzoon, Martyn Waghorn, Jack Marriott
Aston Villa (4-2-3-1): Jed Steer; Ahmed Elmohamady, Axel Tuanzebe, Tyrone Mings, Neil Taylor; Conor Hourihane, John McGinn; Albert Adomah, Jack Grealish, Anwar El Ghazi; Tammy Abraham
Subs: Lovre Kalinic, Kortney Hause, Mile Jedinak, Henri Lansbury, Glenn Whelan, Andre Green, Jonathan Kodjia
Inkhel tan atangin an innawr tawk viau mai a, team pahnihte hian a chak zawk tan £180 million vel zet neih theihna hun tha a ni tih an hria a, tlawm zawk nih an tum lo dun hle.
Goal thun hmasa nih tumin beihpui an thlak dun a, hun tha siam dan an ngaihtuah a, heti chung hian khawi team mah hian goal chu an thun thei mai bik lo thung a. Aston Villa chu team pahnihah chuan an chungnung zawk mah a, hun tha erawh an hmang tangkai thei bik chuang tlat lo.
Half time a hnai zel a, goal thun loin an innawr chho zel a, minute 44-ah goal a lut ta nge nge a. Conor Hourihane chuan dinglam sirah ball chu Albert Adomah a pe phei a, Adomah chuan Ahmed Elmohamady chu a pe ve leh chhawng a. Defender Elmohamady chuan Derby box lamah ball chu a pet phei a, hei hi Anwar El Ghazi chuan goal-ah chuan a lo tauh lut a, Aston Villa chu 1-0 in hma a hruaipui a ni.
Aston Villa lamin goal an thun hnu lawk hian half time a ni zui a, goal dang a luh belh hman ta lo.
Second half an khel leh a, a hma ang bawkin Aston Villa chuan an khel tha leh zawk a, goal khat an thun tawh chu an duhtawk mai lo a, a dang thun belh tumin tan an la leh nghal vat a ni.
Rei tak an khel hman lo, minute 59-ah El Ghazi chuan chuan goal lamah ball chu a pet a, mahse an lo dang per a. Kelle Roos chuan ball kal zel hi lak a tum a, mahse a man fuh lo a, hei hi remchangah lain John McGinn chuan a lo thun a, Aston Villa chuan 2-0 in hma an hruai theih phah a ni.
Derby chuan si hnih ngawt phur tawh mahse chuti maia inpek chu an tum bik lo hle a. Minute 81-ah goal an thun ve ta nge nge a, Florian Jozefzoon chuan vei lam sirah ball a la a, Derby winger hian goal lamah ball chu a vawrh phei a. Heta ball kal hi Jayden Bogle chuan Jack Marriott tan a lo dang a, Marriott chuan goal lamah a pet a, Waghorn chuan a lo dang per a, Aston Villa goal-ah chuan a lut a, Derby si phurh pakhat chu an sut theih phah a ni.
Hemi hnu hian goal dang a luh belh tawh lo a, Aston Villa chu hun tawpah 2-1 in an chak a, 2016 a Premier League atanga an tlak hnua a vawi khatna atan league sang berah hian an let leh thei ta a ni.