25 Mar 2019 05:22

inkhel

Premier League-a ram dang player tha ber Thierry Henry

Thierry Henry chu ram dang player zingah Premier League bika player tha berah an thlang.

1992 atanga Premier League hming a put hnuah England rama league sang ber hian khawvel hmun hrang hranga player tha rual a hip khawm hnem tawh hle a. Club hrang hrang zingah league hming thlak a nih hnu hian Manchester United, Arsenal, Manchester City, Chelsea, Blackburn Rovers leh Leicester City te chuan title an la tawh a, anni hian player tha tak tak an lo chhawr tawh hlawm a ni.

England ram chauh ni lo, Europe khawmualpuia league hrang hrangah ram dang player te tel lo chuan an che thei meuh lo a tih theih hlawm a. Ram dang atanga player an lak luh loh chuan tun ang hian boruak pawh a san theih a rinawm lo a. Premier League velah pawh English, Scottish leh Irish player te chauh hi tel thei se, a hmuhnawm dan a tlahniam viauin a rinawm.

Tun hnaiah BBC chuan Premier League bika ram dang player tha ber thlanna an buatsaih a, hetah hian mi 2,50,000 vel zetin vote an thlak a. A tawpah Arsenal leh France striker hlui Thierry Henry chu a chungnung ber a, vote tla zawng zawng atangin 45% zet mai a hmu a, a sang fal hle.

Arsenal legend Thierry Henry hian Arsenal tan game 258 a khel hman a, hengah hian goal 175 ngawt mai thunin, mi goal thun tur vawi 74 chu a siamsak hman bawk a. Vote hi 45% ngawt mai hmuin pakhatna a ni chiang hle a, a hnuai chiahah hian Cristiano Ronaldo chu awmin, Manchester United star hlui hian vote tla zawng zawng atangin 14% chu a hmu ve a ni.

Portuguese superstar Cristiano Ronaldo chuan Old Trafford-ah bul a tan tha teh chiam lo a tih theih a, mahse Sir Alex Ferguson hnuaiah nasa takin hma a sawn chho a, khawvela player tha ber pawl a ni chho thei a. Kum 34-a upa Ronaldo chuan Manchester United tana a khelh chhungin goal 86 a thun hman a, mi goal thun tur vawi 34 chu a siamsak hman bawk a ni.

Pathumnaah hian Manchester United star dang a awm a, Red Devils player ropui berte zinga sawi hmaih ngai loh Eric Cantona chuan vote 12% hmuin pathumna dinhmun hi a luah a. French star hian Manchester United tan game 156 khel hmanin, hengah hian goal 70 a thun a, mi goal thun tur vawi 56 a siamsak hman bawk a ni.

Vote hmuh dan:

Thierry Henry – 45%

Cristiano Ronaldo – 14%

Eric Cantona – 12%

Sergio Aguero – 8%

Didier Drogba – 6%

Peter Schmeichel – 5%

David Silva – 2%

Nemanja Vidic – 2%

Patrick Viera – 2%

Vincent Kompany – 2%

Petr Cech – 1%

David De Gea – 1%