Liverpool tana hun eng emaw chen lo khel tawh, Spaniard goalkeeper Pepe Reina chu Premier League lamah a kir dawna, kaithar Aston Villa chuan an lalut ngei dawn niin a lang.

Villa hian kum 37 mi Reina hi tun season chhung atan loan-in an lalut dawn niin a langa, inremna an neih tawh thu Sky Sports chuan tarlangin, an inlak fel thuai a rinawm.

Reina hi tunah hian AC Milan-ah a awm meka, Sky Sports chuan Milan leh Villa-te inkarah Reina chungchangah hian inremna a awm tawh tih an finfiah thu an tarlanga, kar leh hian Reina hi Birmingham-ah thlawk lutin engkim tih fel a nih tur thu tarlan tel a ni.

Villa goalkeeper Tom Heaton chu a inhliama, inhliam na in tun season-ah a inlan theih tawh dawn loh avangin Villa hian Reina hi an lalut dawn ta chuk chuka, Premier League lama lo tlangnel tawh sa tak Reina pawh hi a phur hle tura ngaih a ni.

Tun Sunday hian Villa chuan Premier League champion lai Manchester City an hmachhawn dawna, he inkhelah erawh Heaton-a thachhangdawl tu Orjan Nyland chuan si ban a la nghak dawn.

Reina hian kum 2018 nipui lai khan AC Milan a zawma, Milan tan hian game 13 chiah a la khel. Kum 2005 atanga kum 2014 thleng khan Reina hi Liverpool tan a lo khel tawha, Reds tan hian vawi 285 lai inlan hmanin a ram Spain tan vawi 36 a khel tawh bawk a ni.