​Premier League-a kir chak Pochettino

12th February 2020, 02:02PM

Tottenham-in nikum November thlaa an ban tak Argentine manager Mauricio Pochettino chuan hautak dawn mahse Premier League-a kir leh a chak thu a sawi.

Sawi tawh angin nikum November thla ni 19 khan Tottenham chuan Pochettino hi an bana, Pochettino hi Europe-a club lian tak tak te nen sawizawm ni mahse tun thlengin kum 47 mi hian club enkawl a la nei leh lo.

Pochettino hi Manchester United bakah Real Madrid, Barcelona leh Bayern Munich-te nen nasa taka sawizawm ni mahse tih puitling eng mah vawiin thlengin a la awm lova, khawilam nge a pan dawn sawi thiam a har hle.

Premier League lama kir leh a tum leh tum loh chungchang zawhna chhangin Pochettino chuan, “Zep loh chuan Premier League-a awm leh hi ka chaka, a hautak dawn tih ka hria a, tunah chuan nghah rih a ngaia, eng nge thleng zel tur chu kan hre chho mai ang.

“Ka tan inen letna hun a ni a, football tan hian kan inpuahchahin ka inpeih renga, a chhan chu eng emaw thleng thut thei a ni a, ka inpeih reng a ngai a ni. Chona thar ka nghaka, chona thar hmachhawn turin ka inpeih bawk. Ka inring tawka, ka chona hmachhawn leh tur hi a phurawm dawn hlein ka hria,” a ti.

Sawi zelin, “Tottenham-a ka hun hman kha ka chhuang em em a, ka hun hman dan ka chhut let hian thil tha tam tak a awma, Tottenham kha hun pawimawh takah ka enkawl.

“Khatih hunlaia ka hun tawn kha a hautak em em a, White Hart Lane ti chhiain stadium thar sak a ni a, chutih laiin Wembley-ah leh Milton Keynes-ah te kan khelh a ngaia, football hrethiam tak tak te chauhin khati ang dinhmuna awm kha a harsat zia kha an hria ang.

“Tottenham-ah khelh dan thar put luh te kha thil awlsam a ni hauh lova, mahse kan hlawhtlinna kha ka chhuanga, Tottenham kha level dangah kan hlang. Kum thum emaw kum li emaw chhung Champions League kan khel a, Arsenal chungah vawi tam tak kan awm bawka, sulhnu tha tak kan hnutchhiah. Title la phei ila chu kan tan lawmman hlu tak a ni dawna, mahse sulhnu tha tak kan hnutchhiaha, chu chu title lak aiin a hlu zawk a ni,” a ti bawk.

Copyright © inkhel.com 2024. All rights reserved.