Premier League-ah defender tha tak tak an awm laiin tuna la inkhel mek zingah hian world-class han tih tur, a bikin centre-back zingah an tam lo hle.

Mi tam tak chuan Liverpool defender Virgil Van Dijk chu Premier League-a centre-back tha berah an ngaia, a dik reng bawka, mi tam tak chuan Dutch defender hi khawvela centre-back tha berah an ngai bawk.

Premier League-ah hian centre-back tha tak tak; mahse an that ang aia fak hlawh tam lo an awm ve bawka, chung chu underrated ti a sawi thin an ni.

Premier League centre-back zinga underrated ber pahnih-te chu Manchester City defender Aymeric Laporte leh Brighton captain Lewis Dunk-te an ni.

Laporte leh Dunk lo pawh hi Premier League-a centre-back underrated tak tak an awma, ngaihdan pawh a inang lo fur ngeiin a rinawm. Liverpool defender Joel Matip leh Joe Gomez-te pawh an underrated ti pawl an awma, Leicester City defender Caglar Soyuncu pawh hi tun lai centre-back underrared ber zinga chhiar theih a ni a, midang pawh an la awm nual awm e.

Article hi mimal ngaihdan a ni a, kan ngaihdan a hrang nuai ngeiin a rinawma, Premier League-a centre-back underrated-a kan ngaih te chu comment lamah sawi ho ila, ngaihdan i thawh tlang ang u hmiang.

Aymeric Laporte

Inkhel en ngun tan chuan Laporte-a that zia hi a hai theih lova, City defender zinga tha ber a ni a, chu chu City manager Pep Guardiola ngei pawhin a lo sawi tawh.

Laporte hi centre-back ah chuan a tlanchak pawl leh che rang pawl a ni a, hemi avang hian Guardiola chuan left-back ah pawh chhawr chang a nei fo va French defender hi a buai ngai lo.

Kum 25 mi Laporte hi 6ft 3’ laia sang a ni a, sang viau mahse sawi angin a tlan chakin a che ranga, tharum angaha, a zuang sang bawka, inkhel a man em em bawk avangin paltlang a har hle a, City defence pawt khawm tu ber a tih loh theih loh.

Laporte hian kum 2018 khan Athletic Bilbao atangin Manchester City hi a zawma, a manah City hian pound maktaduai 57 sengin, mi tam takin Laporte-a man hi a to uchuak an ti a, mahse tunah erawh a to loh zia a langa meka, Laporte City tana defender tangkai ber a ni chho mek a ni.

Lewis Dunk

Dunk hi Brighton captain a ni a, Premier League ngainatu te chuan a khel kan en fo tawh ngeiin a rinawma, Brighton tlar hnunga Shane Duffy nena an khawng zia leh ngheh zia chu sawi tam ngai lovin kan hre theuh awm e.

Brighton khaw chhuak Dunk hi 6ft 4’ laia sang a ni a, a palen em avangin hian striker palian tak tak te tan pawh paltlang a hara, tharum a ngahin ball kangah a tha a, Laporte anga tlan chak ni lem lo mahse ball kalna tura a awm thiam em avangin mi tam chuan Chelsea captain hlui John Terry nen a khelhdan hi an lo khaikhin fo tawh thin nghe nghe.

Brighton khaw chhuak a nih angin Brighton academy chhuak a ni a, kum 2010 atang khan Brighton senior team lamah kum 28 mi hi a khel tawha, kum 2013-a Bristol City tan loan-a a khelh zuai bak chu Brighton tan bak a la khel lo.

Kum 2018 October thla khan Dunk hian Brighton-ah contract thar a ziaka, a contract hi kum nga daih niin kum 2023 thleng a ni. Tun season atan khan Brighton manager thar Graham Potter chuan club captain atan a ruat.

Dunk hi tha hle mahse team liana a khelh loh avangin a langsar thei meuh lova, mahse Manchester City leh Chelsea-te nen pawh sawizawm a ni fo tawha, tun thlasik bazar chhung ngei pawh hian Chelsea chuan pound maktaduai 50-in an dawr tih thawm a awm.

Kum 28 lai ni tawh mahse England tan vawi khat chiah a la inlana,a inkhelh chhun hi kum 2018 November thla daih tawh kha niin Wembley Stadium-a England leh United States inkhelh tumin Dunk hi a khel tluan.

Brighton tan a khelh that em avangin kumin Euro khelh turah pawh England head-coach Gareth Southgate chuan Dunk hi a inhliam thut te a nih loh chuan a koh a rinawm hle a, England tan Harry Maguire nen tlar hnungah an inkawp lovang tih a sawi theih loh a ni.