Heavyweight boxing Champ Anthony Joshua-a chuan Povetkin a hneh chuan Wilder a hmachhawn ngei tur thu a sawi. Heavyweight lalpa tih hiala an vuah, boxer rothap Wladimir Klitschko meuh hnehtu hian a fight leh hmasa berah Alexander Povetkin a hmachhawn dawn a, hemi fight-ah hian a chak anih chuan Wilder nen an intum hmel ta hle.
Anthony Joshua leh Wilder te hi inhnek tawh tura rin an ni a, US dollar 50 million hial hlawh tura an sawmna chu Joshua-a hian a lo hnawl tawh. Boxing fans tam tak an lungngai hman a, nimahsela tunlai boxer tha pahnih Tyson Fury leh Wilder te chu December thla hian inhnek tura tih an ni leh ta zawk a, boxing fans tam tak lungngaihna chu thawi dam a ni leh ta thung. Nimahsela boxing fans tam zawk erawhin Anthony Joshua leh Wilder inhnek tur ai chuan an ngaihven lo deuh a tih theih ang.
Boxing Champion Joshua-a hian Wilder nena intum a duh chuan Povetkin a hneh phawt a ngai dawn a, inhnek hautak tak chu a ni ngei dawn. Anthony Joshua-a chuan, "Wilder hi ka boxer pui anih angin ka zah hle a, professional boxing ka luh tirhin kum 5 vel a lo khel tawha, tunah erawh ani aiin ka thleng sang tawha, khawvel mipuiin heavyweight boxing thi tawh kai tho lehtu ka nihna hi an theihnghilh ngailo, " a ti bawk.
Heavyweight boxing hian Oscar Dela Hoya, Floyd Mayweather leh Manny Pacquiao an lar atangin ngaihven a hlawh ta lo hle a, tun hnaia Klitschko hnek tlawmtu Anthony Joshua erawh heavyweight boxing ropuina kai tho lehtu tia sawi an awm nawk mai. Muhammed Ali, Mike Tyson, Lennox Lewis leh Holyfield te hnu lamah boxing fans tam zawkin weight hniam inhnek an thlir chak tawh zawk.
Nimahsela hneh theih loh hiala an ngaih Wladimir Klitscho hnek tlawmtu Anthony Joshua erawhin heavyweight boxing ropuina a kai tho leh. Joshua-a hian a tumpuite hi K.O deuh vekin a hneh a, boxing record-ah pawh mi 21 hmachhawn tawhin a la chak vek. Hetih lai hian kutthlak nat em avanga hmingthang tak Deontay Wilder hneh erawh a awlsam theilo. Wilder-a hian mi 40 hmachhawn tawhin a la chak veka, knockout deuh vekin a tumpuite hi a hneh nghe nghe.