13 Mar 2019 08:37

inkhel

Postseason-ah ka la tel leh dawn: LeBron James

LeBron James chu tun season-ah a beisei angin a awm thei ta chiah lo a, NBA playoff a tel a beiseiawm tawh lo a, heti chung hian kum dangah a la tel leh ngei tur thu a sawi.

Los Angeles Lakers forward LeBron James chu a team thar nen an beisei angin an che fuh thei ta lo a, Los Angeles khawpuia a season hmasa berah vawi 4 ngawt MVP lo ni tawh James chuan NBA playoff hi a khelh phak a beiseiawm tawh lo hle.

Thawhlehni khan a zawna vawi 5 chak tawh lo Lakers chuan Chicago Bulls an hneh a, 123-107 a an chak khan James chuan point 36 ngawt a score a, he inkhelah hian point score hnem ber a ni nghe nghe a. Lakers chu chak mahse season an pawh sei phah hmel lo hle a, James chuan hun lo awm zel turah playoff chu an la khelh tho tur thu hi a sawi a ni.

James chuan, “Playoff kan khel thei ta lo a nih tak leh a entu lamah ka lo tang ve tawh mai ang a. Tun dinhmunah chuan playoff khel thei tur hian beiseina a sang tawh lo hle a, West-ah hian team dangte chuan an khel tha thei hlawm em em mai a, hei vang hian kan tan chuan beisei san a harsa tawh a ni,” a ti.

“Kan inkhelh apiangin theihtawp chhuahin hma sawn zel kan tum a pawimawh a. Tun season-ah chuan kan beisei ram thleng thei dawn lo mah ila, a tawpna tur a la ni mai lo a. Postseason-ah hian hun dangah ka la tel ve leh ngei dawn a, tun season-ah hi chuan a nih tur ang a ni zo tawh a, kan tan thlak danglam theih a ni vak tawh lo a, a nih ang hi kan pawm thiam mai a ngai,” a ti bawk.

A sawi zelnaah, “Tun season chhungin hmabak kan nei tlem tawh hle a, khelh tur kan la neih hi Lakers player naupang tak takte tan a pawimawh hlawm viau a. Playoff team te kan la hmachhawn zel dawn a, kan player zingah tlema kum naupang zawkte tan intuaihriamna hun tha tak a ni thei dawn a ni,” a ti.