Bruno Fernandes chu Portugal coach-in in lamah a thawn haw a, international break chhung chu Manchester United-ah a kir lo bawk ang.

Bruno Fernandes hi a inhliam lo a, coach nen an inkarah harsatna a awm lo. Club tana tha taka khel tura coach-in a duh avangin chawlh an pe zawk a, March ni 30-a United-in Brentford an hmachhawn hunah Bruno hi a inlan thei ang.

Friendly match-a Portugal-in 5-2 a Sweden an hneh tum khan Bruno hian goal a khung nghe nghe. 

Portugal manager Roberto Martinez chuan Bruno Fernandes bakah  Bernardo Silva, Ruben Dias, Joao Palhinha, Nelson Semedo, Toti Gomes, Rafael Leao leh Goncalo Ramos te chu a chawlh hahdam tir bawk a ni.

Thawhlehni hian Portugal chuan friendly match-ah Slovenia an hmachhawn dawn, hetah hian Martinez chuan player naupang thenkhat a chhawr dawn niin a lang.

"Player dang te pawh enchhin an ngai a ni, Slovenia hi Sweden nen an khelh dan a inang hlawm a, striker pahnih an hmang thin, chuvang chuan heng player Bernardo Silva, Ruben Dias, Joao Palhinha, Nelson Semedo, Toti Gomes, Rafael Leao, Bruno Fernandes leh Goncalo Ramos te hi ka chawlh hahdamtir.

"Kan game dawt lehah hian player tha dang 8, thahrui ngah leh chak duh em em te an rawn inlan thei turah ka ngai," tiin Portugal manager Roberto Martinez chuan a sawi.

International break lai mah ni se, Erik ten Hag chuan United team te training a neihpui reng tho a, Carrington trianing ground-ah player inhliam rawn dam leh te nen training programme an nei mek.