Mizoram Premier League (MPL) Season 8 khelh mekah October ni 30, Nilaini zan round 8 match hnuhnung ber Mizoram Police FC leh Chanmari FC inkhelah Mizoram Police FC chuan 2-1 a Chanmari FC hnehin point 3 hlu tak an hlawh chhuak a, asang pali zingah telin semifinal khelh beiseina an nei thar leh ta a ni. He inkhelah hian Police forward Malsawmfela chu Man of the match-ah thlan a ni.

Team pahnih te hi round 2-ah intawng tawhin Mizoram Police FC hian 3-2 in anhneh a, an intawn vawihnihnaah pawh Mizoram Police FC bawk chungnung zawkah an tang leh ta a ni. Mizoram Police FC hian point 12 neiin palina an ni mek a, Chanmari FC hian point 11 neiin pangana an ni ta a ni.

First half-ah goal khat alut a, second half-ah goal hnih a luh belh bawk. Police tan Malsawmfela leh F Lalrinpuia (Valpuia) chuan goal khat ve ve an khung a, Chanmari tan David Lalrinmuana chuan goal khat a khung ve bawk.

07:00 PM Mizoram Police FC 2-1 Chanmari FC

(Malsawmfela 43', F Lalrinpuia 88') (David Lalrinmuana 75')

MoM: Malsawmfela, Mizoram Police FC

First half-ah Chanmari chuan inkhel thunun zawk mahse goal hlauhawm erawh hmuh tur atam lo a, Chanmari chuan goal thunna hun tha nei nghalin box chhung chiah atanga forward Lalnunzama shot tha zet chu Police keeper Muanawma'n adan sak hnuah mual dinglam sir atanga Lalnunzama ball pek chu midfielder Remruata'n apet goal dawn nia alan laiin Muanawma chuan a dan sak bawk.

Police pawhin nawr let ve bawkin box pawn chiah atanga Malsawmfela shot tha zet chu Chanmari keeper T Mawia'n adan sak. Goal lut lo in hun chanve an hmang zo mai dawn emaw tih hnu huntawp nan minute 2 ala awmin Police forward Sawmfela'n ball tha a hmuh chu box-ah lalutin an hmahruaina goal a thun a, Police chuan 1-0 a hmahruaiin chawlhlawk an hmang zui ta a ni.

Second half-ah Chanmari bawk chuan inkhel thunun zawkin an siphurh sutna hun tha an nei nual a, midfielder Zakaria shot tha zet chu Police keeper Muanawma'n a dan sak. Police pawhin goal thun belhna hun tha nei ve bawkin Sawmfela'n a hun tha a hmang tangkai thei bik lo.

Minute 75-ah Chanmari chuan freekick an hlawh chhuak hlauh. Bench atanga lut David Rinmuana rawn pen chhuakin an siphurh sutna goal mawi takin a khung. Chanmari chuan nawr chhunzawmin goal thun belhna hun annei zui leh a, David Rinmuana corner pet tha zet chu Dawngtea chuan goal-ah chantir tumin pet mahse, an vanneihna ni a nilo a ni ang e, goal sirah chiah a kal a, Police an him hram.

Goal luh belh lo in 1-1 in an inhneh tawk mai dawn emaw tih hnu huntawp dawn minute 2 ala awmin midfielder R Malsawmtluanga (Msa) corner pet tha zet chu F Lalrinpuia (Valpuia) chuan pet lutin an goal hnihna a khung a, 2-1 in hnehna an chang zui ta a ni.

November ni 1, Zirtawpni tlai zan dar 7:00-ah Mizoram Police FC hian Electric Veng FC an hmachhawn ang a, November ni 2 Inrinni zan dar 7:00-ah Chanmari FC hian FC Venghnuai an hmachhawn ang.

(adsbygoogle = window.adsbygoogle || []).push({});