Poland-a gold medal latu Mary Kom

17th September 2018, 01:09AM

Poland rama hmeichhe tana boxing tournament buatsaihah MC Mary Kom chuan 48kg category-ah gold medal a la a, Manisha pawhin 54kg category-ah silver medal a la bawk a ni.

Gliwice, Poland-a 13th Silesian Open Boxing Tournament an neih chu an zo fel a, vawi nga ngawt world champion lo ni tawh Mary Kom chuan a tumpui chu a hneh chiang hle a. Mary Kom hian final-ah Kazakhstan boxer Aigerim Kassanayeva chu 5-0 in a hneh a, gold medal a dawng a ni.

Kumin chhungin Mary Kom hian gold medal pathum a lakna chiah a ni a, a hmain Delhi khawpuia India Open leh Gold Coast Commonwealth Games-ah te gold a lo la ve ve tawh a. A inhliam avangin Asian Games-ah khan a tel thei ta lo a, Bulgaria-a Strandja Memorial Tournament-ah silver medal a la bawk a ni.

Kum 35-a upa Olympic bronze medalist hi a khingpui Aigerim Kassanayeva aiin a hniam zawk a, a kechheh chu a dik thlarh zawk a, counter-attacking tha tak hmangin Kazakh boxer hi a hneh a ni.

India coach Rafaelle Bergamasco chuan Mary chu a fak hle a, “Mary kha a che tha tawpkhawk a, duhthusamin final-ah khan a khel a ni,” a ti.

Manipuri boxer, 2014 Asian Games gold medal lo la tawh hian a khingpui southpaw chu hun tha a siamsak lo hle a, a kut dinglam chuan a hnek fuh nasa hle a, Aigerim hi mumal takin a inhnek fuhtir mang lo a ni.

Manisha chuan 54kg category final-ah Ukraine boxer Ivanna Krupenia a hmachhawn a, Manisha hian nawr zawk viau mahse 2-3 in a chak ta lo a, silver medal a la a ni.

He tournament-ah hian India aiawhte chuan bronze medal 4 an la bawk a, world champion hlui L Sarita Devi (60kg), Ritu Grewal (51kg), Lovlina Borgohain (69kg) leh Pooja Rani (81kg) te chu bronze medal latute an ni.

Youth competition lamah Jyoti Gulia (51kg) chu India tana medal dawng awm chhun a ni a, Gulia hian gold medal a dawng a. World champion a lo nih tawh bakah Indian boxer zingah chuan thla thara Argentina rama Youth Olympic Games-a tel thei tur awm chhun a ni bawk.

Junior competition-ah India team te chuan medal 13 ngawt an la thei a, gold medal 6, silver medal 6 leh bronze medal 1 an la a ni.

Copyright © inkhel.com 2024. All rights reserved.