Khabib Nurmagomedov chuan tun hnaia a hneh tak Dustin Poirier te pawl tan pawisa a tuak teuh mai a, $100,000 zet chu a tuak ngah a ni.
Abu Dhabi khawpuia UFC 242 ah khan Khabib chuan Poirier chu a hneh a, anni pahnih hi insual hlim hlawl ni mah se Russian fighter chuan American fighter T-shirt chu a zawrhsak a, heng atang hian $100,000 zet chu a hmuhsak a ni.
UFC president Dana White pawhin UFC 242 zawha press conference an neihin Khabib Nurmagomedov-a’n sum a hmuhsak ang zat chu a pek ve tur thu a sawi a, a takah erawh a la tihlawhtling ve rih lo thung.
Tun thla tira lightweight title an inchuh zawhah Khabib leh ‘The Diamond’ te hian an kawr an inthleng a, an inzahtawn tih an lantir a. Dagestani fighter chuan Poirier-a kawr chu sum tuakna atan zawrh a tum thu sawiin, a sum hmuh chu Good Fight Foundation hnena hlan a tum thu a sawi a ni.
Dustin Poirier chuan, “Khabib khan khatiang khan a ti dawn tih ka hre lo hrim hrim a. Pawisa tam tham tak mai a hmu thei a, kan pawl tana pawisa tuak hnem ber a la ni a, kan beisei phak bak a ni,” a ti.
“Kan sum dawn hmang hian thil tha tak kan ti teuh thei dawn a, Khabib hian a sum rawn thawh hmang hian mi tam tak tan thil tha deuh a ti dawn a. Fighter te’n thilthlawnpek an pe thin hi a ropui a, kum khat leh a chanve chhung chauhin kan pawl pawh a thang nasa hman hle,” a ti bawk.
A sawi zelnaah, “Kan chunga thil thleng avang hian ka lawm em em mai a, hetiang thil hian hlimna min thlen nasa thei hle a. Khabib hian kan pawl tan $100,000 zet mai a rawn thawh a, hei hi ka kawr a hralhna atang khan ni ngeiin kan hria a ni,” a ti.
“Engtin tak nge sum hi a tuak tih chu kan hre chiang vek lo a, amah pawh biakna hun ka la nei lo a, hmaichhana lawmthu hrilhna hun ka la nei lo. Eng pawh ni se, pawisa chu a rawn thawh a, kan pawl sumah kan dah lut nghal vek a ni,” tiin a sawi.
Poirier te pawl Good Fight Foundation chu Fight For The Forgotten te nen an tangho a, tuilianin a tihbuai mek Uganda rama Batwa pygmy naupangte tanpuina kawngah an thawkho mek a ni.
“Batwa pygmy naupangte tanpuina tur hian $25,000 tuak kan rilruk a, kan thil tum hi a let tam takin kan khum thei a. Heti a nih takah chuan $50,000 vel chu hmang turin kan insiam rem leh dawn a ni,” tiin Dustin Poirier chuan a sawi.