11 Sep 2019 05:10

inkhel

Poirier-a chona McGregor-a’n a chhang

Dustin Poirier chuan Khabib Nurmagomedov a hneh loh hnuah UFC champion hlui Conor McGregor a cho thu a sawi a, hei hi Irish fighter hian a chhang rang hle.

UFC 242 ah UFC lightweight title lo kawl lailawktu Dustin Poirier chuan Khabib Nurmagomedov a hneh lo a. A chak loh hnu hian division hniha UFC world champion lo ni tawh Conor McGregor chu Twitter lamah a cho thu a tarlang a ni.

2014 kumah khan Conor McGregor chu a inhliam dam leh hnuah Octagon lamah a inlan leh a, Ireland ramah The Notorious One hian Diego Brandao chu a hneh a. September 27, 2014 ah Conor hian UFC chu contract a ziahpui a, UFC 178 ah Dustin Poirier nen hian an insual a ni.

UFC 178 ah hian Conor McGregor leh Dustin Poirier te insual chu mi nghahhlelh ber mai a ni a, McGregor hian Poirier chu UFC top 10 featherweight fighter zinga a hmachhawn hmasak ber a ni bawk.

An insualah hian Poirier chu a che tha zawk dawn emaw tih laiin first round-ah minute 1:46 a kal hman chauh tiin Conor McGregor chuan Poirier-a beng bulah chuan left hook a pe fuh a, a chak zui nghal der a ni.

Inrinni zanah khan Abu Dhabi khawpuiah Poirier chu Octagon-ah a chak lo a, heti chung hian The Diamond hian Twitter lamah fight a neih leh theih tur a ngaihtuah zui nghal a. UFC lightweight champion hlui Conor McGregor hming a lam chhuak a, McGregor vs Poirier 2 thlentir leh a duh a ni.

Poirier-a thil tweet hi Conor pawhin a hmu vat a, rang takin a chhang let nghal bawk a. Second 90 chhung leka a hnek tluk theih thu tarlangin, Poirier chuan a hming a lam dawn a nih pawhin zah taka lam turin a chah ve nghal a. Chutianga a tih a nih chuan a chona pawh chu a lo ngaihtuah tur thu a tarlang bawk a ni.