Premier League inkhelah Arsenal chuan Premier League table mawng phaha awm mek Watford chu Vicarage Road-ah an luhkhunga, Arsenal hian si hnih faia hma an hruai hnuah 2-2 in team hnihte an inhnehtawk.

Arsenal hian bul an tan chhe lova, first half-ah goal hnih an khunga, Gabonese striker Pierre-Emerick Aubameyang-a thun ve ve niin Gunners hi awlsam taka chak tura ngaih an ni hman. Second half-ah Arsenal hi an khel chhe takzet a, Watford hian team lian zawka ngaih Arsenal an ngam miah miah hle.

Mual veilamah Gerard Deulofeu a tal naa, Arsenal right-back Maitland-Niles chuan Barcelona winger hlui hi a chang hneh meuh lo. Watford lam hian chance an ngaha, chance vawi 31 zet neiin, Arsenal hian chance vawi sarih bak an nei lo.

Second half-ah Watford hian an si phurh an sut zo va, Tom Cleverley leh Roberto Pereyra-te chuan Watford tan goal khungin, 2-2 in inkhel a tawpa, Watford hian point thum an hlawhchhuak lo hi an ui hle ang tih a rinawm a, Arsenal erawh point khat an hlawhchhuah avangin an lungawi viau a ngai thung a tih theih awm e.

Arsenal lam an khel chhiaa, an centre-back pahnih Sokratis leh David Luiz-te chu an khel a nawi viau a ni ber. Watford goal hmasa zawk hi Sokratis-a tihsual chiang em em mai a ni a, Watford goal hnihna hi Luiz-a’n ho taka penalty a chawi atanga khung a ni bawk.

Arsenal midfielder Granit Xhaka chuan, “Second half-ah khan tum angin kan khel lova, half-time a dressing-room lama kan luh kha chuan engkim a la fuh vek. Half-time ah khan kan hlim tlanga, mahse kan rawn chhuaka second half kan khel chhe hle.

“Point kan hlawhchhuak hrim hrim kha kan lawm a ngai a, second-half ah khan hlauh neiin kan khel a ni ber. Min nawr na dawn tih kan hre saa, chuvang chuan kan hlau a, khati ang tur kha a ni lo hle a, khati ang khan second half kan khel tur a ni lo,” a ti.