Season liamta khan Premier League-ah Manchester City chu point 98 hmuin an champion a, an hnuai chiaha awm Liverpool chuan point 97 lai an hmu ve bawk.

City hian season liamta hma leh chiah khan point 100 an hmu a, chiang taka champion-in, tun season hnih liamta chhungin point 198 lai an hmu tihna a ni.

City hi season tharah pawh champion tura rinkai ber an ni leh dawn a, mahse an playmaker Kevin De Bruyne chuan point 90 chuang hmu lo pawhin an champion theih tawh mai a inring.

De Bruyne chuan, “Champion leh turin season hnih liamta kha kan khum ngei ngei a ngai hran lova, point 85 hmu pawhin kan champion thei tawh maithei. Hmasawn zel chauh hi a ni lova, khelh that mar pat reng hi a pawimawh ber. Game tina tha taka khelha, hnehna chan tum reng a ngai.

“A hmaa kan khelh that tawh phei chuan a hma aia khelh that tum zel chu a harsaa, tunah pawh kum hnih kalta chhunga kan title lak kha lak leh kan tum dawn a, a awlsam dawn lo mahse la thei tur zinga tel nih hi a lawmawm em em a ni,” a ti.

De Bruyne chuan a chawlh hman dan tlem sawi zuiin, “Kar thum ka chawlh chhung khan eng mah ka ti lova, football atanga inthiarfihlim rih kha ka duh ber a ni. A zawnin kum hnih ka inkhel tawh ang a ni a, football pawn lamah hun nuam tak hman ka chak ve tawha, chuvang chuan football atangin ka inthiarfihlim.

“Kum hnih a zawna inkhelh chu taksa lamin tuar lutuk lo mahse rilru lam hian a tuar ve viau a, break mumal nei lova kum hnih a zawna inkhelh chu a harsa ve hle. Tlema chawlh inpek ka ngaiin ka hria a, chu chu ka tih pawh a ni a, tunah chuan pre-season khel turin ka rawn kir tawh. Season tan hun atan inbuatsaihna hun tha ka nei a ni,” a ti bawk.