​Point 3 kan phu lo: Solskjaer

14th July 2020, 05:07PM

Manchester United chuan Premier League inkhel pawimawh takah Southampton chu Old Trafford-ah an lo inhnehtawkpuia, United manager Ole Gunnar Solskjaer chuan an chak zo lo chu pawi ti viau mahse, point 1 chu an phu tawkah a ngai.

United hian a goal chhuah hmasa mahse a hnuah 2-1 in hma an hruai renga, an chak tawh mai dawn anga a lan hnuah, injury time tawp lamah goal chhuah lehin, 2-2 in team hnihte hi an inhnehtawk.

United hi chak se chuan Leicester City leh Chelsea te lehpelin, pathumnaa awm thei tur ni mahse, point khat chiah an hlawhchhuah tak avangin, an awmna ngai panganaah an awm chhunzawm.

Solskjaer chuan, “Kan goal chhuah hun kha goal chhuah hun lo ber a ni a, mahse khatiang kha football-a thil thleng thei a ni miau. Kan pawm thiam a ngai a, a chhan chu keini ngei pawh khatianga nga chak kha kan lo nei fo tawh.

“He team tana inzirna zel a ni a, pawi ka ti a, a chhan chu point 3 kan hui vek dawn emaw kan ti hman tawh. Mahse point 3 hlawhchhuah kha kan phu lo pawh a ni maitheia, a chhan chu an khel tha em em a, tharum an ngahin, an fit hle. (lo copy paste tawh lo teh u)

“Kan passing kha a dik hleithei lova, 2-1 a hma kan hruai hnu ngat phei chuan chance insiam mahse ila kan passing a dik tawk lova, a chang kha chuan kan khel tha viau tho bawk,” a ti.

Mi tam chuan United in a tawpa goal an chhuah chhan chu player te chauh tawh vang niin an sawia, mahse Solskjaer chuan a pawm ve lo thung. Solskjaer chuan, “Kan chauh vangah kan ngai ve lova, kan chance kan chhawr tangkai tawk lo zan leh an chance a tawpa an hman tangkai zan a ni ve mai zawkin ka hria.

“De Gea khan save tha tak vawi khat a neia, khami tih loh chu keimahni vekin chance kan nei. Southampton hi team tha tak an ni a, anni hian point 3 an hlawhchhuah tir mai mai dawn lo che u a ni,” a ti bawk.

Copyright © inkhel.com 2024. All rights reserved.