Stephen Curry chuan NBA regular season-ah Golden State Warriors player zinga point 15,000 score tling thei pangana a ni chu lawmawm a tih thu a sawi.

Golden State Warriors leh Memphis Grizzlies inkhelh tumin Stephen Curry chuan point 20 a score a, Warriors chu 110-93 in an chak a. Curry hian NBA regular season-ah point 15,000 a thun tling ta a, Warriors player zingah chuan hetiang zat thun thei pangana a ni.

Curry hma hian Wilt Chamberlain, Rick Barry, Paul Arizin leh Chris Mullin te chuan point 15,000 an lo thun tling tawh a. Warriors player ropui tak takte huanga a awm ve thei ta chu Curry chuan lawmawm a tih thu sawiin, inchhuanna tham a tlin thu a sawi bawk.

Kum 30-a upa Curry chuan, “Hun lawmawm tak mai ka tawng a, kum 9 leh a chanve chhunga ka hun hman dan te ka ngaihtuah let leh char char a. Hun lo la awm zel turah pawh tha taka ka khelh theih zel ka beisei a. Hetianga mel lung thar ka phun ve thei ta mai hi a ropui ka ti a ni,” a ti.

“Kum kha leh chen chhung khan team ang pawhin hlawhtlinna chi hrang hrang kan lo nei tawh a, mi mal ang pawhin chawimawina te ka lo dawng ve nual tawh bawk a. Ka tan chuan khatiang hun zawng zawng kha a hlu em em vek mai a, kan zinkawng hi a la tawp mai lo a, kan la kal zel dawn a ni,” a ti bawk.

A sawi zelnaah, “Nakinah chuan ka chawl hahdam ang a, awm hmunah tun ang hun te hi ka la ngaihtuah let fo thin dawn a. A tira ka suangtuahnaa awm pha lo thil hi ka tawng hnem tawh hle a ni,” a ti.